وزیر عظم عمران خان کا کہنا ہے کہ  تعمیرات سیکٹر سے معیشت مستحکم ہو رہی ہے۔

تفصیلات کے مطابق  وزیر عظم عمران خان کی زیر صدارت قومی رابطہ کمیٹی برائے ہاؤسنگ، تعمیرات و ڈیویلپمنٹ کا اجلاس ہوا۔

چیئر مین سی ڈی اے  نے اجلاس کو سیکٹر ای الیون میں تعمیرات کے حوالے سے بریفنگ  میں بتایا کہ  اس سیکٹر کے منصوبوں کے لیے الگ قوانین بنا لیے گئے ہیں۔ زیر التوا منصوبوں کو جلد مکمل کیا جائے گا۔

چیئرمین سی ڈی اے نے بریفنگ میں بتایا کہ  تمام نئی تعمیرات میں پارکنگ اور گزرگاہ کے لیے مناسب فاصلے کا خاص خیال رکھا جائے گا۔

اجلاس میں نیو بلیو ایریا منصوبے کے بارے بھی بریفنگ دی گئی۔

چیف سیکریٹری خیبر پختونخوا نے صوبے کے 11 بڑے شہروں کے ماسٹر پلان کے حوالے سے  بریفنگ  میں بتایا کہ  قبائلی اضلاع میں 8 مقامات کے  لیے ماسٹر پلاننگ کا عمل جاری ہے۔

چیف سیکرٹری خیبرپختونخوانے کہا کہ صوبہ میں شہری ترقی کے منصوبوں کے لیے مالی سال 2020-21 میں 242 ارب روپے مختص کیے گئے ہیں جس میں سے دسمبر 2020 تک 61 ارب روپے خرچ کیے جا چکے ہیں۔

شہری ترقی کے لیے قانونی اصلاحات پر بھی بریفنگ دی گئی گئی۔

چیف سیکریٹری سندھ نے تعمیراتی منصوبوں کی پیش رفت کے حوالے سے آگاہ کیا جس پر   وزیر اعظم نے  عدم اطمینان کا اظہار کرتے ہوئے کہا کہ  شہری ترقی اور تعمیرات میں ماحولیاتی تحفظ کا خاص خیال رکھا جائے اور سبزے کو حتیٰ الامکان بچایا جائے بلکہ اس میں اضافہ کیا جائے۔

وزیر اعظم نے کہا کہ  تعمیرات سیکٹر سے معیشت مستحکم ہو رہی ہے اور روزگار کے مواقع پیدا ہو رہے ہیں۔ صوبائی حکومتیں مراعات میں توسیع سے بھر پور فوائد حاصل کریں گی۔