صوبائی وزیر صنعت وتجارت میاں اسلم اقبال نے کہا ہے کہ این آر او کے حصول کیلئے قوم کو تقسیم کرنے والوں کی ہر سازش ناکام ہوگی۔

تفصیلات کے مطابق صوبائی وزیر صنعت وتجارت میاں اسلم اقبال نے اپنے کیمپ آفس میں پارٹی ورکرز کے وفد سے ملاقات کے موقع پر اظہار خیال کرتے ہوئے کہا کہ اپوزیشن نے اقتدار میں ہوتے ہوئے قومی اداروں کو تباہ کیا اب اداروں کا گھیراؤکر رہی ہے۔

میاں اسلم اقبال نے کہا کہ پاکستان کے باشعور عوام نے اپوزیشن کا ہر منفی ہتھکنڈا اور ترقی کے خلاف سازش کو ناکام بنایا ، ہر محاذ پر شکست کے بعد اپوزیشن کو اپنا غیر جمہوری اور منفی رویہ ترِک کر دینا چاہیے۔

صوبائی وزیر صنعت وتجارت کا کہنا تھا کہ عوام کی زندگیوں کو خطرے میں ڈال کرسیاسی دکان چمکانے میں ناکامی پر اپوزیشن مایوسی کا شکار ہے،2018 ء کے انتخابات میں عوام نے لٹیروں سے اقتدار چھینا اور 2023 ء میں ان کی منفی سیاست ہمیشہ کیلئے دفن کردیں گے۔

 میاں اسلم اقبال نے کہا کہ تیزی سے آگے بڑھتا ہوا پاکستان پی ڈی ایم کو گوارا نہیں جبکہ اپوزیشن کی ملک میں عدم استحکام پیدا کرنے کی گھٹیا سیاست ناکام ہوگی۔

صوبائی وزیر صنعت وتجارت نے یہ بھی کہا کہ قوم کورونا وباء سے لڑ رہی ہے اور اپوزیشن اپنی لوٹی ہوئی دولت بچانے کے لئے فکر مند ہے لیکن اب ان کی لوٹی ہوئی دولت بچے گی اور نہ ہی سیاست

میاں اسلم اقبال کا کہنا تھا کہ عمران خان نے برسوں کرپشن کے خلاف جنگ کی ہے،کرپٹ ٹولہ عمران خان کے ہوتے ہوئے این آر او کو بھول جائے، وزیر اعظم عمران خان کی قیادت میں کرپشن کیخلاف جنگ منطقی انجام تک پہنچائیں گے۔

صوبائی وزیر صنعت وتجارت میاں اسلم اقبال کا مزید کہنا تھا کہ پاکستان تحریک انصاف کی حکومت عوام سے کیے گئے وعدوں کی تکمیل کی جانب بڑھ رہی ہے جبکہ پارٹی کارکن کی قیمتی اثاثہ ہیں، ترقی کے عمل میں ان کی آرا اور تجاویز کو پوری اہمیت دی جارہی ہے، وزیر اعظم عمران خان قوم کی امید ہیں اور وہ قوم کو مایوس نہیں کریں گے۔