وزیراعلیٰ پنجاب سردار عثمان بزدار نے کہا ہے کہ حکومت کے دامن پر سکینڈل کا کوئی داغ نہیں۔

وزیراعلیٰ پنجاب سردار عثمان بزدار نے اپنے ایک بیان میں کہا کہ ہمارا ڈھائی برس کا مختصر دور سابق ادوار کی 3 دہائیوں کے مقابلے میں شفاف ترین ہے۔

سردار عثمان بزدار نے کہا کہ سابق ادوار میں ہر روز کرپشن کا نیا سکینڈل سامنے آتا تھا، عوام آج بھی کرپشن کی داستانوں کو نہیں بھولے۔

وزیراعلیٰ پنجاب کا کہنا تھا کہ ماضی میں قومی وسائل کو بے دردی سے لوٹا گیا جبکہ سابق حکمران وہی کاٹ رہے ہیں جو انہوں نے بویا۔

 سردار عثمان بزدار کا یہ بھی کہنا تھا کہ ہم نے لوٹ مار کے کلچر کو دفن کر دیا ہے، قومی وسائل میں خیانت کرنے والوں کی پاکستانی سیاست میں کوئی جگہ نہیں۔

وزیراعلیٰ پنجاب سردار عثمان بزدار  کا مزید کہنا تھا کہ ہمارے منصوبوں پر کوئی انگلی نہیں اٹھاسکتا، وزیر اعظم عمران خان کی قیادت میں نئے پاکستان کی منزل کی جانب بڑھ رہے ہیں اور اللہ تعالیٰ کا شکر ہے کہ ہماری حکومت کے منصوبے معیار اور شفافیت میں اپنی مثال آپ ہیں۔