پاکستانی بالرز نے شاندار بالنگ کا مظاہرہ کرتے ہوئے جنوبی افریقی ٹیم کو 220 رنز پر آل آؤٹ کردیا۔

تفصیلات  کے مطابق نیشنل اسٹیڈیم کراچی میں کھیلے جانے والے پہلے ٹیسٹ میچ میں جنوبی افریقہ نے ٹاس جیت کر پہلے بیٹنگ کرنے کا فیصلہ کیا جو ابتدائی سیشن میں بظاہر درست ثابت ہوا۔

پہلے سیشن میں جنوبی افریقہ نے دو وکٹوں کے نقصان پر 100 سے زائد رنز اسکور کر رکھے تھے۔تاہم کھانے کے وقفے کے بعد سے پاکستانی بالرز چھائے اور جنوبی افریقی بلے بازوں کو جم کر کھیلنے نہ دیا۔

جنوبی افریقہ کی جانب سے ڈین ایلگر 58 اور جارج لنڈے 35 رنز بناکر نمایاں رہے۔

ان کے علاوہ فاف ڈوپلیسی 23،کگیسو ربادا 21 ،ٹمبا باوومااور ریسی وینڈر ڈسن 17،17 ، کپتان کوئنٹن ڈی کوک 15 اورایڈن مارک رام 13 رنز بناسکے۔

اینرچ نورٹجے اور کیشو مہاراج بغیر کوئی رن بنائے ہی پویلین لوٹ گئے۔

پاکستان کی جانب سے  یاسر شاہ 3 وکٹیں لے کر نمایاں رہے جبکہ   ڈیبیو کرنے والے نعمان علی کے حصے میں 2 وکٹیں آئیں۔

شاہین شاہ آفریدی  بھی 2 وکٹیں لینے میں کامیاب رہے جبکہ  حسن علی نے ایک کھلاڑی کو آؤٹ کیا۔

واضح رہے کہ یہ جنوبی افریقہ کا پاکستان میں دوسرا کم ترین اسکور ہے۔جنوبی افریقہ پاکستان میں کم ترین اسکور 214 رنز ہے جو  کہ 1997 میں فیصل آباد میں بنایاتھا۔