وزیراعظم عمران خان کی نیویارک میں امریکی صدرڈونلڈ ٹرمپ سے ون آن ون ملاقات ہوئی۔

ملاقات میں وزیراعظم عمران خان نے امریکی صدر کو کشمیر میں ہونے والی انسانی حقوق کی خلاف ورزیوں اور مسلسل کرفیو سے آگاہ کیا، انھوں نے کہا کہ بھارتی اقدام سےخطے کی صورتحال مزید خرابی کی طرف بڑھے گی۔

عمران خان نےصدر ٹرمپ سے یہ بھی کہا کہ میں افغان مسئلے پر بات کرنا چاہتا ہوں یہ مسئلہ ہمارے لیے بہت اہم ہے۔

اس موقع پر میڈیا سے بات کرتے ہوئے امریکی صدرڈونلڈ ٹرمپ نے کہا کہ عمران خان سے ملاقات میں پاکستان کےساتھ کئی معاملات پر بات چیت جاری ہے۔

امریکی صدر کا کہنا تھا کہ پاکستان کے ساتھ امریکا کی تجارت بہت کم ہے، پاکستان کےساتھ تجارت چارگنا بڑھائیں گے۔

صدرڈونلڈ ٹرمپ کا یہ بھی کہنا تھا کہ پہلےامریکی قیادت کومعلوم نہیں تھا کہ پاکستان سےکیسےروابط رکھنے ہیں، مجھ سےپہلےحکمرانوں نے پاکستان کےساتھ اچھا سلوک نہیں کیا۔

امریکی صدر نے کہا کہ عمران خان ایک اچھے لیڈر ہیں اور میں وزیراعظم عمران خان اور پاکستان پر اعتماد کرتا ہوں۔

صدرڈونلڈ ٹرمپ نے یہ بھی کہا کہ ہر مسئلے کا کوئی نہ کوئی حل ہوتا ہے، بھارت سے اچھے تعلقات ہیں لیکن کل بھارتی وزیراعظم نےبہت جارحانہ زبان استعمال کی۔

ملاقات میں امریکی صدر کا کہنا تھا کہ میں کشمیر کے مسئلے میں مدد کرنا چاہتا ہوں، میری دونوں ممالک سے اچھے تعلقات ہیں۔

صدرڈونلڈ ٹرمپ کا ملاقات میں یہ بھی کہنا تھا کہ کشمیر کے مسئلے پر ثالثی کی پیشکش اب بھی برقرار ہے،اگر پاکستان اور بھارت چاہیں تومسئلہ پر ثالثی کے لئے تیارہوں۔

امریکی صدرڈونلڈ ٹرمپ کا مزید کہنا تھا کہ بہت سارے ممالک نے اس تین روز میں مجھ سے ملنے کی خواہش اظہار کی، مگر پاکستان کے وزیر اعظم عمران خان نے ملنے کی میری خواہش تھی۔