وزیر اعظم عمران خان نے میر پور آزاد کشمیر میں زلزلے سے متاثرہ علاقے کا دورہ کیا اور ڈی ایچ کیو اسپتال میر پور میں زخمیوں کی عیادت بھی کی۔

وزیر اعظم عمران اپنے خصوصی دورہ پر آزاد کشمیر میرپور پہنچے تو وزیراعظم آزادکشمیر راجہ محمدفاروق حیدرخان کابینہ کے وزراء، چیف سیکرٹری آزادکشمیر ویگر نے استقبال کیا۔

اس موقع پر وزیراعظم عمران خان کے ہمراہ کے ہمراہ وزیرخارجہ شاہ محمود قریشی، وزیرامورکشمیروگلگت بلتستان علی امین گنڈاپور، چیئرمین NDMA لیفٹیننٹ جنرل محمدافضل، پی ٹی آئی آزادکشمیرکے صدربیرسٹرسلطان محمود چوہدری، سیکرٹری امورکشمیروگلگت بلتستان طارق پاشا اوردیگراعلیٰ حکام بھی موجود تھے۔

وزیراعظم عمران خان کومیرپوراسٹیڈیم میں 24 ستمبرکوآزادکشمیرمیں ہونے والے زلزلہ کے نقصانات کے بارے میں چیف سیکرٹری آزادکشمیرنے بریفنگ دی۔

وزیراعظم آزادجموں وکشمیر راجہ محمدفاروق حیدرخان نے وزیراعظم پاکستان کوبتایا کہ زلزلے کے فوراً بعد ریسکیو کاکام شروع کر دیا گیا تھا فوجی حکام کے ساتھ مل کرمحکمہ شاہرات نے متاثرہ علاقوں کی سڑک کوبحال کیا۔

راجہ فاروق حیدرخان نے کہا کہ زلزلہ اوراس کے بعد آنے والے آفٹرشاکس سے مکانات اور سرکاری عمارتیں بری طرح متاثر ہوئیں جس کی تعمیر نواورمتاثرین کی بحالی کے لیے ایک بڑے اور جامع پیکج کی ضرورت ہے تاکہ نہ صرف متاثرین کی بحالی ہو،اس کے ساتھ ساتھ مستقبل میں بھی اس قسم کی آفات سے بچاؤممکن ہوسکے۔

وزیراعظم پاکستان نے متاثرین کی بحالی کے لیے پیکج کااعلان کرتے ہوئے کہاکہ ہم آپ کے دکھ درد میں برابرکے شریک ہیں اورہمیں آپ سے دلی ہمدردی ہے اورہم متاثرین کی بحالی کے لیے تمام ممکنہ اقدامات اٹھائیں گے۔ ہماری حکومت اس سلسلہ میں ہرممکن امداد فراہم کرے گی۔

بعدازاں وزیر اعظم ڈسٹرکٹ ہیڈ کوارٹراسپتال پہنچے جہاں انہوں نے زلزلے سے متاثرہ زخمیوں کی عیادت کی اور حکام کوہدایت کی کہ وہ زخمیوں کوہرممکن سہولیات فراہم کریں تاکہ زخمی جلداز جلد اپنے گھروں کولوٹ سکیں۔

وزیراعظم عمران خان کی طرف سے تمام زخمیوں کوپھولوں کے گلدستے بھی دیئے گئے۔

وزیراعظم کا کہنا تھا کہ آزاد کشمیر اور میر پور کے لوگوں  سے دلی ہمدردی  ہے ،حکومت ماثرین کی بحالی کے لئے پیکج تشکیل دے رہی ہے۔

وزیراعظم عمران خان کا مزید کہنا تھا کہ میں یہاں کے لوگوں کا دکھ محسوس کر سکتا ہوں ، زلزلے سے ہونیوالے جانی و مالی نقصان پر افسوس ہے، زلزلہ متاثرین کے لیے ہر ممکن اور فوری اقدامات کیے جائیں گے۔

واضح رہے کہ آزاد کشمیر ،اسلام آبا د اور ان سے ملحقہ کئی علا قوں میں منگل کی سہ پہر کو 5.8 کی شدت کا زلزلہ آیا تھا جس کے باعث 40 افراد جاں بحق جبکہ 400 سے زائد افراد زخمی ہوئے۔