ترجمان دفتر خارجہ زاہد حفیظ نے کہا ہے کہ مستحکم اور خوشحال افغانستان کے لیے پاک افغان کا مشترکہ طور پر کام کرنا ضروری ہے۔

تفصیلات کے مطابق ترجمان دفتر خارجہ زاہد حفیظ نے اپنے ایک بیان میں کہا کہ افغان سفیر کی بیٹی کا مبینہ اغوا کےمعاملے پر افغان وفد نے یکم سے 8 اگست  تک اسلام آباد کا دورہ کیا،دورے کے دوران قانون نافذ کرنے والے اداروں اور وزارت خارجہ کے حکام سے ملاقات کی ہے۔

ترجمان دفتر خارجہ کا کہنا ہے کہ افغان وفد کو مذکورہ واقعے کی متعلقہ پاکستانی حکام کی جانب سے کی جانے والی تحقیقات کے تمام پہلوؤں پر جامع بریفنگ دی گئی  ہے، افغان وفد کو بتایا گیا کہ پاکستان افغانستان کے ساتھ اپنے تعلقات کو بہت اہمیت دیتا ہے۔

زاہد حفیظ کا کہنا ہے کہ افغان وفد کو سیف سٹی آفس اسلام آباد بھی لے جایا گیا ، جہاں انھیں مختلف اوقات اور مختلف مقامات کی کئی ویڈیو فوٹیج دکھائی  گئیں ہے،ان ویڈیوز میں شکایت کنندہ افغان سفیر کی بیٹی کو واضح طور پر پہچانا جا سکتا تھا کہ وہ آزادانہ طور پر مختلف جگہوں پر گھوم رہی ہے۔

ان کا کہنا تھا کہ افغان وفد کو شکایت کنندہ افغان سفیر کی بیٹی کے دورہ کردہ تمام مقامات کا دورہ کرایا گیا ۔ افغان وفد کو تکنیکی ڈیٹا (موبائل فرانزک/جیو فینسنگ کے نتائج) بھی پیش کیے گئے  ہیں۔

زاہد حفیظ کا کہنا تھا کہ افغان وفد کو بتایا گیا کہ قانون نافذ کرنے والے اداروں نے شکایت کی تفصیلی اور مکمل تفتیش کی ہے ، تفتیش اور گواہوں کے بیانات کے بعد حکام اس نتیجے پر پہنچے ہیں کہ زمینی کے نتائج شکایت کنندہ کی رپورٹ کی تصدیق نہیں کرتے ہیں۔

ترجمان دفتر خارجہ کا کہنا تھا کہ  وفد کو اسلام آباد میں افغانستان کے سفارت خانے اور اس کے قونصل خانوں کی سکیورٹی بڑھانے کے لیے کیے گئے اقدامات سے بھی آگاہ کیا گیا ہے۔