اپوزیشن لیڈر سندھ اسمبلی حلیم عادل شیخ کا کہنا ہے کہ بھٹو اور بے نظیر کی جماعت کو بلاول نے چھوٹی جماعت بنا دیا ہے۔

تفصیلات کے مطابق اپوزیشن لیڈر سندھ اسمبلی حلیم عادل شیخ نے اپنے وڈیو بیان میں کہا کہ چیئرمین نے غیر ذمہ دارانہ بیان دیا کہ 11 سو ارب کے پیکیج میں ایک روپیہ خرچ نہیں ہوا۔

انہوں نے کہا کہ بلاول صاحب سندھ حکومت کی سائیڈ دیکھ کر بالکل درست کہہ رہے ہیں، وفاقی حکومت کا 62 فیصد اور 38 فیصد سندھ حکومت کا شیئر تھا، سندھ حکومت کا اب تک زیرو خرچ ہوا ہے۔

حلیم عادل شیخ نے کہا کہ وفاق کے تحت 35 ارب نالوں کی صفائی پر خرچ ہورہے ہیں، گجر، محمود آباد اور اورنگی ٹاؤن نالے کا 80 فیصد کام مکمل ہوچکا ہے۔

اپوزیشن لیڈر سندھ اسمبلی نے کہا کہ سندھ حکومت نے ایک بوند پانی کراچی کو نہیں دیا، کے فور پر اب واپڈا کے حوالے ہے اور تیزی سے کام جاری ہے، 13 سالوں میں سندھ حکومت نے ایک بس بھی عوام کو نہیں دی۔

حلیم عادل شیخ نے کہا کہ بلاول نے دعویٰ کیا کہ اگلا الیکشن کراچی سے جیتیں گے، کراچی کو 13 سال میں ایک رجیکٹڈ شخص مرتضیٰ وہاب دے کر الیکشن جیتنے کے خواب دیکھ رہے ہیں، اسی سندھ حکومت نے کراچی کو دنیا کے 10 گندے ترین شہروں میں شمار کروایا تھا۔

اپوزیشن لیڈر سندھ اسمبلی حلیم عادل شیخ نے مزید کہا کہ 13 سال سے کراچی سمیت سندھ بھر کی عوام آپ کو جانتی ہے، کراچی تو چھوڑیں پورے سندھ سے پی پی کو شکست ہوگی۔