ممکنہ دہشت گردی سے نمٹنے کے لئے جرمن پولیس   نے بڑے پیمانے پر مشقوں کا انعقاد کیا۔

مغربی ذرائع ابلاغ کے مطابق ممکنہ دہشتگردی سے نمٹنے  کے لئے  جرمن پولیس نے کمر کس  لی ہے۔کسی بھی ناخوشگوار صورتحال کا موثر جواب دینے  کے لئے پولیس نے گذشتہ بیس سال کے دوران سب سے بڑی مشق کی ۔

 اس مشق کے دوران کئی مواقع پر حقیقی حملے کا گمان ہونے لگا ۔

 جرمنی کے نیورم برگ کے ریلوے اسٹیشن پر مشکوک افراد کی آمد  کی سنسنی پھیلائی گئی۔ نقاب پوشوں نے کہیں گھات لگائی تو کہیں کھلے عام گولیاں برسائیں ۔
اس موقع پر جرمن پولیس نے  بھی ڈرامائی انداز میں انٹری ماری   اور چند لمحوں میں دہشتگردوں کو قابو کرلیا ۔

جرمن میڈیا  کے مطابق  انسداد دہشتگردی کی اس مشق میں  300 اہلکار شریک تھے ۔اس  مشق کو بیس سال کے دوران ہونے والی سب سے بڑی مشق قرار دیا جارہا ہے ۔یہ  ساری دوڑ دھوپ کا مقصد جرمن شہروں میں پیرس اور برسلز طرز کے حملے ناکام بنانا تھا ۔

یاد رہے کہ برسلز اور پیرس ماضی میں بد ترین دہشت گردی کا نشانہ بن چکے ہیں۔ دہشت گردوں کے حملے میں کئی معصوم لوگ اپنی جان گنوا بیٹھے ہیں ۔سن 2016 میں بیلجیم کے دارالحکومت برسلز کے ایئرپورٹ اور سب وے میں کیے گئے بم دھماکوں کے نتیجے میں 35 افراد ہلاک  ہوگئے تھے۔

اس سے ایک برس قبل 2015 میں فرانسیسی دارالحکومت پیرس میں 7  مختلف مقامات پر خود کش حملوں اور فائرنگ کے نتیجے میں 130 زائد افراد ہلاک اور 300 سے زائد زخمی ہوئے تھے۔ ریسکیو آپریشن کے دوران 8 حملہ آور بھی ہلاک ہوئے تھے۔