سینیٹر فیصل جاوید خان نے کہا ہے کہ وزیراعظم عمران خان کچھ دنوں میں کامیاب پاکستان کا آغاز کریں گے۔

تفصیلات کے مطابق سینیٹر فیصل جاوید خان  نے اپنے ایک بیان میں کہا کہ عمران خان کے بطور وزیر اعظم آج 3 سال مکمل ہوگئے،  1.5سال کوویڈ کے باوجود  حکومت نے قابل ذکر کامیابیاں حاصل کیں۔

فیصل جاوید خان نے کہا کہ وزیراعظم آنے والے دنوں میں پی ٹی آئی حکومت کی 3 سالہ کارکردگی کے حوالے سے ایک تقریب سے خطاب کریں گے ۔

سینیٹر فیصل جاوید نے یہ بھی کہا کہ یہ پہلی حکومت ہے جو اپنی کارکردگی کی رپورٹ باقاعدگی سے عوام کے سامنے پیش کرتی ہے، یونیورسل ہیلتھ کوریج، سماجی بہبود پروگرام احساس،  10 سالوں میں 10 ڈیم، بلین ٹری پروجیکٹ جیسے منصوبے شروع کیے ۔

فیصل جاوید خان کا کہنا تھا  کہ کم لاگت گھروں کی تعمیر،معاشی بحالی اور ٹیک آف،کورونا کنٹرول پر بہترین حکمت عملی اور بیرون ملک مقیم افراد کے لیے بھی  اقدامات کئے جبکہ صنعتوں ، زراعت اور خدمات کے شعبوں میں نمایاں تیزی سیاحت کو بھی  فروغ ملا ۔

سینیٹر فیصل جاوید خان کا  مزید کہنا تھا کہ وزیراعظم عمران خان کچھ دنوں میں کامیاب پاکستان کا آغاز کریں گے، ملک کی 40 فیصد آبادی جو غربت کے نیچے زندگی بسر کر رہی ہے ، ہر خاندان کے ایک فرد کے لیے فنی تربیت ، ہر خاندان کے لیے ہیلتھ کارڈ ، بلا سود قرضے دیے جائیں گے۔