چیف سیکرٹری پنجاب کامران علی افضل نے کہا ہے کہ افسران اپنے فرائض بلا خوف و خطر سر انجام دیں۔

تفصیلات کے مطابق چیف سیکرٹری پنجاب کامران علی افضل کی زیرصدارت سیکرٹریز کیساتھ تعارفی اجلاس ہوا جس میں کہا گیا کہ  عوام کی بہبود،ترقیاتی منصوبے، گورننس کی بہتری، میرٹ اور مکمل شفافیت اول ترجیحات ہونگی۔

 چیف سیکرٹری پنجاب  کا کہنا تھا کہ افسران کو کام کرنے کی مکمل آزادی دی جائے گی لیکن جوابدہی سخت ہوگی،تبادلے سوچ سمجھ کر اور صرف میرٹ اورکارکردگی کی بنیاد پر کئے جائیں گے۔

کامران علی افضل کا کہنا تھا کہ عوام کی بہبود ریاست کا بنیادی منشور اور ذمہ داری ہے،اس منشور پر عملدرآمد سرکاری افسران کا فرض ہے۔

ان کا کہنا تھا کہ ترقیاتی منصوبوں کی بروقت تکمیل کو یقینی بنایا جائے گا اکاؤنٹیبیلٹی  کے بغیر شفافیت کو یقینی نہیں بنایا جا سکت،کام صرف میرٹ پر ہوگا۔

 چیف سیکرٹری پنجاب کا کہنا تھا کہ  کرپشن کےخلاف زیرو ٹالرنس کی پالیسی ہوگی، ناقص کارکردگی اور کرپشن کسی صورت برداشت نہیں کی جائے گی۔

چیف سیکرٹری  پنجاب  کا کہنا تھا کہ عام آدمی کا ایک بڑامسئلہ مہنگائی ہے، مہنگائی پر قابو پانے کیلئے عملی اقدامات کئے جائیں۔

ان کا کہنا تھا کہ  ذخیرہ اندوزوں اور نا جائز منافع خوروں کیخلاف سخت کارروائی کی جائے،انضباطی کارروائی سے صرف وقتی بہتری لائی جا سکتی ہے۔

چیف سیکرٹری پنجاب کامران علی افضل کا  مزیدکہنا تھا کہ پنجاب سیکرٹریز اپنے کردار کی مثال کے ذریعے محکموں میں بہتری لائیں۔

 چیف سیکرٹری پنجاب اجلاس میں ایڈیشنل چیف سیکرٹری،ایڈیشنل چیف سیکرٹری داخلہ، چیئرمین پی اینڈ ڈی اور تمام سیکرٹریز نے شرکت کی۔