یونیسکو کشمیر کے مسئلے کے حل کیلئے اپنا کردار ادا کریں، شفقت محمود
وفاقی وزیربرائے وفاقی تعلیم و خصوصی تربیت شفقت محمود نے کہا کہ پاکستان کشمیریوں کے بنیادی انسانی حقوق کی بحالی کیلئے یونیسکو کے کردار کا خواہاں ہے۔
تفصیلات کے مطابق وفاقی وزیربرائے وفاقی تعلیم و خصوصی تربیت شفقت محمود نے یونیسکو ہیڈکوارٹر پیرس میں یونیسکو کی جنرل کانفرنس کے 40 ویں اجلاس کی جنرل پالیسی ڈیبیٹ کےموقع پر کہا کہ اقوام متحدہ کی سلامتی کونسل کی قراردادوں کے مطابق کشمیر بین الاقوامی سطح پر تسلیم شدہ متنازعہ علاقہ ہے، لہذا یونیسکو اور عالمی برادری کشمیر کے دیرینہ مسئلے کے منصفانہ حل کیلئے اپنا کردار ادا کریں۔
وفاقی وزیربرائے وفاقی تعلیم نے کہا کہ بھارت کی جانب سے 5 اگست سے مقبوضہ جموں و کشمیر میں یکطرفہ طور پر کشمیر کی خود مختاری کو مسخ کرنے کے بعد سے تقریباً پندرہ لاکھ سے زائد طلبا و طالبات سکول جانے سے قاصر ہیں۔
وفاقی وزیر نے یہ بھی کہا کہ مقبوضہ جموں و کشمیر میں اسی لاکھ سے زائدکشمیری عوام پر گزشتہ سو دنوں سے بھارت کی جانب سے لگائے گئے غیرقانونی و غیر آئینی کرفیو کی وجہ سے وہ اپنے انسانی حقوق اور بنیادی آزادی سے محروم ہیں جہاں انہیں بنیادی سہولیات اور ذریعہ مواصلات کی بھی رسائی ممکن نہیں ہے جو عالمی انسانی حقوق و بنیادی حق آزادی رائے کے خلاف ہے۔
شفقت محمود نے بھارتی سپریم کورٹ کے بابری مسجد کے متعلق حالیہ فیصلے پر افسوس کا اظہار کیا اور کہا کہ یہ فیصلہ یونیسکو کے مذہبی اور ثقافتی مقامات کے تحفظ کے اقدار کے خلاف ہے۔
وفاقی وزیر نے پا کستان اور ہندوستان کے درمیان کرتارپور راہداری منصوبے کے حالیہ افتتاح کا ذکر کرتے ہوئے کہا کہ پاکستان کی جانب سے یہ اقدام مذہبی رواداری اور خطے میں امن قائم کرنے کی کوششوں کا منہ بولتا ثبوت ہے۔
اپنے بیان میں شفقت محمود نے یہ بھی کہا کہ موجودہ حکومت بین الاقوامی معیار کے مطابق مساوی نصاب تعلیم دینے کیلئے انتہائی اقدامات کررہی ہے۔
وفاقی وزیر کا کہنا تھا کہ ان اقدامات میں یونیفارم، نظام تعلیم، غیر تعلیم یافتہ بچوں کو سکولوں میں داخلے، اساتذہ کے طریقہ تدریس کے معیار کو مزید بہتر کرنا اور تکنیکی اور پیشہ وارانہ تربیت کے پروگرامز شامل ہیں۔
وفاقی وزیربرائے وفاقی تعلیم و خصوصی تربیت شفقت محمود کا مزید کہنا تھا کہ پاکستان یونیسکو کے ساتھ مل کر چھوٹے جزیروں اور ترقی پذیر ریاستوں کے طلبا کو ماسٹرز اور پی ایچ ڈی سکالرشپ فراہم کر رہا ہے اور اس سلسلے میں پاکستان نے یونیسکو کے لڑکیوں کے تعلیمی فنڈ میں دس ملین امریکی ڈالر کی خطیر رقم بھی فراہم کی ہے۔
اس موقع پر یونیسکو کے 193 ممبر ممالک اور دس ایسوسی ایٹ اراکین 12 سے 27 نومبر 2019 تک پیرس میں ہونے والی یونیسکو کی جنرل کانفرنس میں شریک ہوئے جبکہ سفیر پاکستان برائے فرانس و یونیسکو میں پاکستان کے مستقل مندوب جناب معین الحق نے بھی اس اجلاس میں شرکت کی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News