وزیراعظم کے معاون خصوصی برائے سیاسی ابلاغ ڈاکٹر شہباز گِل نے کہا ہے کہ 30 سال ملک کو لوٹنے والے 3 سال کی کارکردگی پر سوال کررہے ہیں۔

ڈاکٹر شہباز گِل نے شہباز شریف کے بیان پر ردعمل دیتے ہوئے کہا کہ عوام کا پیسہ لوٹ کر سائیکل کی دکان سے ارب بتی بننے والے کب حساب دیں گے؟ مرحوم والد اور بیٹوں کے نام جائیدادیں بنانے والے کب جواب دینگے؟

انہوں نے کہا کہ تقریریں نہیں، چھوٹے میاں کرپشن اور منی لانڈرنگ کا جواب دیں، روزانہ صبح کاپی پیسٹ شدہ جعلی بیانیہ پھیلایا جاتا ہے، ایک ہی طرح کی لائنز لکھ کر عوام کو گمراہ نہیں کیا جا سکتا۔

شہباز گِل نے مزید کہا کہ غریب کے نام پر غریب کو لوٹنے والے مردہ ضمیر لوگ خوف خدا کریں، عوام مہنگائی کی وجوہات جانتے ہیں آپ اپنے مقدمات کا جواب دیں۔

اس سے قبل پاکستان مسلم لیگ (ن) کے صدر اور قائد حزب اختلاف شہبازشریف نے اپنے بیان میں کہا ہے کہ موجودہ حکومت نے تین سال میں ملک کو مہنگائی، غربت اور بے روزگاری کے سمندر میں ڈبو دیا ہے، موجودہ حکومت عوام سے انتقام لے رہی ہے۔

انہوں نے کہا کہ جنہیں امنگیں تھیں، وہ اس ناقص کاکردگی پر مایوس ہوچکے ہیں ، تین سال میں کوئی مثبت  تبدیل نہیں لائی جاسکی۔

شہباز شریف نے کہاکہ سوئی سدرن گیس نجی صنعت اور مقامی پیداواری یونٹس کو آج سے گیس بند کردی ہے ، کیا یہ تبدیلی ہے؟ گیس کی اس بندشن کے نتیجے میں لاکھوں لوگ بے روزگار ہوجائیں گے، کیا یہ تبدیلی لانی تھی ؟

ان کا کہنا تھا کہ مہنگائی کا طوفان ہے اور غریب عوام ہیں، کیا اسے تبدیلی کہتے ہیں؟ اسٹیٹ بینک ایک مرتبہ پھر شرح سود بڑھا نے جارہا ہے، کیا یہ تبدیلی ہے؟ دانستہ 10.2 فیصد سود پر ملنے والے قرض کو ساڑھے11 فیصد میں لیاجائے اور قومی خزانے کو 70 کروڑکا نقصان پہنچایا جائے، کیا یہ تبدیلی ہے؟

ان کا کہنا تھا کہ بینک دولت پاکستان آئی ایم ایف کے قابو میں آجائے ، اسے تبدیلی کہتے ہیں؟ تین سال میں 20 ہزارارب روپے کا قرض ملک پر چڑھادیاگیا، یہ ہے تبدیلی ؟