اسلام آباد: افغانستان کے نگراں وزیر خارجہ امیر خان متقی نے وزیر خارجہ شاہ محمود قریشی سے ملاقات کی ہے۔

افغانستان کے نگراں وزیر خارجہ امیر خان متقی وفد کے ہمراہ وزارت خارجہ پہنچ گئے، جہاں وزیر خارجہ شاہ محمود قریشی نے ان کو خوش آمدید کیا  جبکہ افغانستان کے نگراں وزیر خارجہ نے مخدوم شاہ محمود قریشی کے ساتھ ملاقات کی ہے۔

اس موقع پر پر وزیر خارجہ مخدوم شاہ محمود قریشی کا کہنا تھا کہ پاکستان، افغانستان کے قریبی ہمسایہ ملک ہونے کے ناطے، افغان بھائیوں کی انسانی بنیادوں پر امداد کے لئے بھرپور کاوشیں بروئے کار لارہا ہے۔

مخدوم شاہ محمود قریشی کا کہنا تھا کہ 15 اگست سے پاکستان، افغانستان کی معاشی و انسانی صورت حال کی جانب عالمی برادری کی توجہ مبذول کروانے کیلئے مسلسل کوشاں ہے اور او آئی سی وزرائے خارجہ کونسل کے غیر معمولی اجلاس کا انعقاد بھی انہی کاوشوں کی ایک کڑی ہے۔

ان کا کہنا تھا کہ ہم اس اجلاس کے ذریعے عالمی برادری کو پیغام دے رہے ہیں کہ ماضی کی غلطیوں سے سبق سیکھتے ہوئے، افغانستان میں امن و استحکام کیلئے آگے بڑھیں۔ افغانستان میں اجتماعیت کی حامل حکومت، بنیادی انسانی حقوق بالخصوص خواتین کے حقوق کی پاسداری افغان حکومت کے مفاد میں ہے۔

شاہ محمود قریشی کا کہنا تھا کہ میں نے اپنے دورہ کابل کے دوران پاکستان کی جانب سے جذبہ و خیرسگالی کے تحت 5 ارب کی امداد کا اعلان کیا تھا ، مجھے یہ بتاتے ہوئے مسرت ہو رہی ہے کہ ہم نے افغانستان کیلئے خوراک، ادویات بشمول پچاس ہزار میٹرک ٹن گندم کی صورت میں انسانی امداد کی فراہمی کے انتظامات مکمل کر لیے ہیں۔

وزیر خارجہ کا کہنا تھا کہ ہماری ٹیم افغانستان میں پاکستان کی معاونت سے چلنے والے تین اسپتالوں کے دورے کیلئے جلد کابل پہنچے گی اور پاکستان آئندہ سال مارچ میں او آئی سی وزرائے خارجہ کونسل کے 48 ویں اجلاس کی میزبانی کیلئے تیار ہے۔

انہوں نے کہا کہ یکے بعد دیگرے دو او آئی سی وزرائے خارجہ کونسل کے اجلاسوں کی میزبانی، مسلم امہ کو درپیش مسائل کے حل کیلئے پاکستان کی سنجیدگی کا اظہار ہے، افغانستان میں 40 سال کے بعد قیام امن کی امید اہمیت کی حامل ہے اس موقع کو ضائع نہیں ہونا چاہیئے۔

شاہ محمود قریشی کا کہنا تھا کہ افغانستان کا معاشی انہدام سب کیلئے یکساں مضمرات کا باعث ہوگا، پاکستان، افغانستان کی ابھرتی ہوئی المناک معاشی صورتحال کی جانب عالمی برادری کی توجہ دلانے کیلئے بھرپور کوششیں بروئے کار لارہا ہے۔

انہون نے مزید کہا کہ ہم مسئلہ کشمیر کے حوالے سے او آئی سی کی مسلسل اور غیر متزلزل حمایت کے شکر گزار ہیں جبکہ اس موقع پر افغان نگران وزیر خارجہ امیر خان متقی نے کہا کہ او آئی سی وزرائے خارجہ کونسل کے اجلاس میں مدعو کرنے پر وزیر خارجہ مخدوم شاہ محمود قریشی کا شکریہ ادا کرتے ہیں۔