میڈیکل بورڈ نے نواز شریف کی صحت کے حوالے سے دستاویزات کو ناکافی قرار دے دیا ہے۔

ذرائع کے مطابق پنجاب حکومت کے میڈیکل بورڈ نے نوازشریف کی رپورٹس کا جائزہ مکمل کرلیا ہے اور بورڈ نے نوازشریف کی صحت کےحوالے سے مہیا کیے گئے دستاویزات کو ناکافی قراردے دیا ہے۔

میڈیکل بورڈ کا کہنا ہے کہ نوازشریف کی صحت سے متعلق دستاویزات محض ایک ڈاکٹر کی خط وکتابت ہے ، ان خطوط کے ساتھ کہیں پر بھی کسی مستند ادارے کی میڈیکل رپورٹ نہیں ہے۔

ان کا کہنا ہے کہ نوازشریف کے کونسے ٹیسٹ کب ہوئے اوراس میں کیا سامنے آیا کی رپورٹس موجود نہیں ، پلیٹ لیٹس،بون میروٹیسٹ سمیت دیگر میڈیکل ایشوزکی رپورٹس موجود نہیں۔

میڈیکل بورڈ کا کہنا ہے کہ مستند میڈیکل رپورٹس کے بغیر کیسے کسی کے متعلق اپنے رائے دے دیں ، خط و کتابت میں مریض کے حوالے سے کیے گئے دعووں کا کوئی ثبوت نہیں دیا گیا۔

واضح رہے کہ میڈیکل بورڈ کی رپورٹ وفاقی حکومت کو بھجوائی جائے گی۔

یاد رہے کہ حکومت پنجاب کے ترجمان حسان خاور نے ٹوئٹر پر جاری ایک پیغام میں کہا تھا کہ وفاقی کابینہ کے فیصلے کی روشنی میں حکومت پنجاب نے نواز شریف کی میڈیکل رپورٹس کے جائزے کیلئے اسپیشل میڈیکل بورڈ تشکیل دے دیا ہے۔

انہوں نے کہا تھا کہ اسپیشل میڈیکل بورڈ سینئر 9 پروفیسرز پر مشتمل ہے ، یہ بورڈ 5 دن کے اندر اپنی رپورٹ پیش کرے گا۔