سپریم کورٹ نےدورانِ سماعت ریمارکس دیے کہ کورٹ مارشل کے خلاف دائردرخواستوں کو جلد سماعت کیلئےمقررکیا جائے۔

تفصیلات کے مطابق سپریم کورٹ میں سابق آرمی افسران کی جانب سے کورٹ مارشل کیخلاف دائر درخواستوں پرسماعت ہوئی۔

جسٹس عمرعطا بندیال کی سربراہی میں تین رکنی بنچ نے دائر درخواستوں پر سماعت کی۔

ایڈیشنل اٹارنی جنرل نے جواب جمع کرانے کیلئےعدالت سے مزید وقت دینے کی استدعا کردی جس پرعدالت نے ایڈیشنل اٹارنی جنرل کو جواب جمع کرانے کیلئے دو ہفتوں کا وقت دے دیا۔

سپریم کورٹ نے ہدایت کی کہ کیس کو جلد سماعت کیلئے مقررکیا جائے۔

درخواست گزارسابق کرنل آزاد منہاس نے استدعا کی کہ عدالت کوئی تاریخ مقررکردے۔

جسٹس عمرعطا بندیال نے ریمارکس میں کہا کہ سپریم کورٹ تاریخ مقررنہیں کرتی، لکھ دیا ہے کہ جلد سماعت کیلئے مقررکیا جائے۔

درخواست گزارنے کہا کہ گزشتہ سماعت پربھی حکومت نے جواب جمع کرانے کیلئے وقت مانگا تھا۔ ہم 26 سال سے انصاف کیلئے دھکے کھا رہے ہیں۔

جسٹس عمرعطا بندیال نے کہا کہ کوئی بات نہیں ہم آپ کو آرام سے سنیں گے۔ آگے اللہ مالک ہے۔

واضح رہے کہ سابق کرنل عنایت اللہ خان اورآزاد منہاس کو 1995 میں بے نظیر کی حکومت گرانے کے الزام میں سزا سنائی گئی تھی۔