ایون فیلڈ ریفرنس کیس میں نیب کی جانب سے مریم نواز کی درخواست پرعدالت کو تحریری جواب جمع کرادیا گیا۔

اسلام آباد ہائی کورٹ میں ایون فیلڈ ریفرنس اپیلیوں پرسماعت ہوئی۔

اسلام آباد ہائیکورٹ کے دورکنی بنچ جسٹس عامرفاروق اورجسٹس محسن اخترکیانی نے کیس کی سماعت کی۔

مریم نوازاور کیپٹن صفدر کی عدالت آمد کے موقع پر ہائیکورٹ اوراطراف میں سیکیورٹی کے سخت انتظامات کیے گئے۔

مریم نواز کےساتھ لیگی رہنماؤں اورکارکنوں سے کمرہ عدالت بھر گیا۔ پرویزرشید، طلال چوہدری، مریم اورنگزیب کمرہ عدالت میں موجود تھے۔

نیب کی جانب سے مریم نواز کی درخواست پر اسلام آباد ہائیکورٹ میں تحریری جواب جمع کرایا گیا۔

عدالت نے مریم نواز کے وکیل عرفان قادر سے استفسار کیا کہ آپ نے وہ جواب دیکھ لیا ہے؟ جس پرعرفان قادر نے عدالت کو بتایا کہ میں نے ابھی جواب نہیں دیکھا۔

اسلام آباد ہائی کورٹ نے وکیل سے کہا کہ آپ نیب کا جواب دیکھ لیں، اس کے بعد دلائل دیں۔

ایون فیلڈ ریفرنس میں مریم نواز اور کیپٹن ریٹائرڈ صفدرکی اپیلوں پر سماعت 10 فروری تک ملتوی کر دی گئی۔

مریم نواز اور کیپٹن صفدر کی جانب سے وکیل عرفان قادرعدالت میں پیش ہوئے جبکہ نیب کی جانب سے عثمان غنی چیمہ، سردار مظفرعدالت پیش ہوئے۔

اسلام آباد ہائیکورٹ نے نیب پراسیکیوٹر سے استفسار کیا کہ آپ کو کورونا کی شکایت تھی، اب آپ کی طبیعت کیسی ہے؟

نیب پراسیکیوٹر نے عدالت کو بتایا کہ اب اُن کی طبیعت بہتر ہے۔

جسٹس محسن اختر نے دورانِ سماعت تاکید کی کہ کوویڈ کی صورتحال خطرناک ہے، سب کو احتیاط کرنی چاہئے۔ سب کے کورونا ٹیسٹ کرائیں۔