لاہور: ٹیسٹ کرکٹر اظہرعلی کا آسٹریلیا کا دورہ پاکستان کے حوالے سے کہنا ہے کہ کوشش ہوگی کہ ہم اچھے میزبان ثابت ہوں۔

قومی ٹیسٹ ٹیم کے سابق کپتان اور کرکٹر اظہر علی کا کہنا ہے کہ آسٹریلیا کے خلاف ٹیسٹ سیریز کے لیے بھرپور تیاری کر رہے ہیں اور کوشش ہے کہ جتنی بھی تیاری ہو سکے کریں، اچھی سیریز ہوگی۔

اظہر علی کا کہنا ہے کہ خوشی کی بات ہے کہ آسٹریلیا کی ٹیم 24 برسوں کے بعد پاکستان کا دورہ کر رہی ہے جبکہ پاکستان کرکٹ کے لیے آسٹریلیا کا دورہ بہت اہم ہے کیونکہ اس کے بعد دیگر ٹیمیں بھی آئیں گی۔

ان کا کہنا تھا کہ کوشش ہوگی کہ ہم اچھے میزبان ثابت ہوں اور آسٹریلیا کی ٹیم اچھی یادیں لے کر جائے۔ یہ ٹیسٹ چیمپئین شپ کے میچز ہیں، پورا پاکستان آئے گا اور آنا بھی چاہیے۔

انہوں نے مزید کہا کہ آسٹریلوی کھلاڑی بھی پاکستان آنے کے لیے پرجوش ہوں گے کیونکہ یہ دورہ طویل عرصہ کے بعد ہے۔

واضح رہے کہ آسٹریلوی کھلاڑی دورہ پاکستان کے لیے بے تاب دکھائی دے رہے ہیں جبکہ گذشتہ دنوں آسٹریلوی بلے باز مارنس لبوشین کا دورہ پاکستان کے حوالے سے بیان سامنے آیا تھا۔

مارنس لبوشین کا سماجی رابطے کی ویب سائٹ پر کہنا تھا کہ میں پاکستان میں کھیلنے کا منتظر ہوں اور مزید انتظار نہیں کرسکتا جبکہ آئی سی سی کے کرکٹر آف دی ائیر شاہین شاہ آفریدی کا سامنا کرنے کے لئے بھی بے چین ہوں۔

یاد رہے کہ آسٹریلیا کے دورہ پاکستان کا آغاز 3 مارچ سے ہوگا جبکہ آسٹریلوی کرکٹ ٹیم دورہ پاکستان کے دوران 3 ٹیسٹ اور 3 ون ڈے میچز کھیلے گی۔