گجرات کے قصائی کہلائے جانے والے بھارتی وزیر اعظم نریندرا مودی نے مسلم خواتین کا سب سے بڑا ہمدرد ہونے کا دعویٰ کردیا ہے۔

اتر پردیش کے شہر سہارن پور میں انتخابی جلسے سے خطاب کے دوران نریندرا مودی نے کہا کہ ’سب کا ساتھ سب کی ترقی‘ اتر پردیش کی ترقی کی کُنجی ہے۔

کانگریس پر تنقید کرتے ہوئے مودی نے مزید کہا کہ ایک پوری خاندانی پارٹی جھوٹے وعدے کر رہی ہے۔ انہوں نے بجلی کا وعدہ کیا تھا لیکن یوپی کو اندھیرے میں رکھا۔

مودی نے مزید کہا کہ اتر پردیش کے لوگوں نے ان کو ووٹ دینے کا فیصلہ کیا ہے جو ریاست میں ترقی چاہتے ہیں، جو اتر پردیش کو فسادات سے پاک رکھیں گے، جو ہماری ماؤں اور بیٹیوں کو خوف سے آزاد کریں گے۔

بھارتی وزیر اعظم نے کہا کہ بے جے پی کے لیے ترقی میں خواتین کا کردار سب سے اہم ہے، آج ہر شعبے میں خواتین کی بھرپور شمولیت ہورہی ہے۔

نریندرا مودی نے مزید کہا کہ ہماری حکومت ہر مظلوم اور متاثرہ مسلمان عورت کے ساتھ کھڑی ہے تاکہ کوئی ان پر ظلم نہ کر سکے۔ رہاست کے وزیر اعلیٰ یوگی آدتیہ ناتھ کی حکومت مسلم خواتین کے خلاف جرائم روکنے کے لیے مسلسل کام کررہی ہے۔

بھارتی وزیر اعظم نے کہا کہ ملک میں مسلمان خواتین کو دیئے گئے حقوق کی فراہمی میں رکاوٹ ڈالنے کے لیے نت نئے طریقے استعمال کئے جارہے ہیں۔

نریندرا مودی نے مزید کہا کہ لوگ مسلمان بہنوں کو ورغلا رہے ہیں تاکہ وہ زندگی کے معاملات میں ہمیشہ پیچھے رہیں۔مسلم خواتین پر ظلم روکنے کے لیے ریاست میں ادیتیہ ناتھ کی حکومت ضرروی ہے۔

دوسری جانب ملک کی کئی ریاستوں میں بی جے پی ہی کی حکومتوں نے مسلمان طالبان پر تعلیم کے دروازے بند کرنے کے لیے حجاب پر پابندی لگادی ہے۔

حجاب پر پابندی کے باعث ملک کی کئی ریاستوں میں ہندو انتہا پسندی کے خلاف مظاہرے بھی ہورہے ہیں۔

واضح رہے کہ 2002 میں بھارتی ریاست گجرات میں ہندو انتہا پسندوں نے فسادات کے دوران ہزاروں مسلمانوں کو شہید اور سیکڑوں خواتین کے ساتھ اجتماعی زیادتی کی تھی ، اس وقت آج کے وزیر اعظم ہی وزیر اعلیٰ تھے۔

بی جے پی کے سابق وزیر اعظم اٹل بہاری واجپائی نے ان فسادات کو بھارت کے لئے شرمناک قرار دیا تھا۔