عبدالقادر پٹیل نے کہا ہے کہ عوام میں کورونا سے متعلق مزید شعور بیدار کرنے کی ضرورت ہے۔

وفاقی وزیر برائے صحت عبدالقادر پٹیل نے پریس کانفرنس کرتے ہوئے کہا کہ سندھ میں کیسز کی شرح میں اضافہ ہوا ہے، کیسز کی زیادہ تعداد کراچی سے سامنے آئی ہے۔

انہوں نے کہا کہ اسپتالوں میں 176 مریضوں کا اضافہ ہوا ہے لیکن اس صورتحال سے گھبرانا نہیں بلکہ احتیاط کی ضرورت ہے۔

عبدالقادر پٹیل نے ملک میں کورونا وائرس کے پھیلاؤ پر تشویش کا اظہار کرتے ہوئے کہا کہ گزشتہ 24 گھنٹوں میں مثبت کیسز کی شرح 4.6 ہو گئی ہے۔

وفاقی وزیر برائے صحت کا کہنا تھا کہ حکومت نے پہلے ہی کورونا سے بچاؤ کے ایس او پیز جاری کئے ہوئے ہیں، اس ایس او پیز پر عملدرآمد کو یقینی بنایا جائے گا۔

انہوں نے کہا کہ ملک میں دو بڑے مذہبی اجتماعات عیدالاضحیٰ اور محرم آرہے ہیں، صوبوں سے کہا گیا ہے کہ وہ اپنی سہولیات کو تیار رکھیں۔

عبدالقادر پٹیل نے یہ بھی کہا کہ چھٹیوں میں تفریحی مقامات پر رش کا رجحان رہتا ہے، عوام اس دوران سوشل ڈسٹنسنگ کا خیال رکھیں، ماسک پہنیں اور سینیٹائزر کا استعمال کریں۔

وفاقی وزیر قومی صحت عبدالقادر پٹیل نے مزید کہا کہ ہمیں ڈرنے کی بجائے احتیاط سے کام لینا ہے، عوام میں کورونا سے متعلق مزید شعور بیدار کرنے کی ضرورت ہے تاکہ لوگ اس مرض سے بچ سکیں۔