حکومت کی جانب سے تاریخ کا بڑا اسکل ڈیولپمنٹ پروگرام شروع کرنے کا فیصلہ کرلیا گیا ہے، وزیر اعظم کی جانب سے بھی ہنرمند پاکستان منصوبے کی منظوری دے دی گئی ہے۔

تفصیلات کے مطابق وزیر اعظم عمران خان کی زیر صدارت نوجوانوں کی فلاح و بہبود سے متعلق اجلاس منعقد ہوا، اجلاس میں معاون خصوصی عثمان ڈار اور شفقت محمود سمیت اعلیٰ حکام نے شرکت کی۔

اجلاس میں بتایا گیا کہ اہم منصوبے کے لیے 30 ارب روپے کی خطیر رقم مختص کی گئی ہے جبکہ وزیر اعظم عمران خان کل ہنرمند پاکستان پروگرام کا افتتاح کریں گے۔

منصوبہ نیشنل اسکل اسٹریٹجی ٹاسک فورس کی تجاویز پر تیار کیا گیا ہے جس میں ٹیچر ٹریننگ، اسمارٹ لیب اور بزنس انکیوبیشن سینٹر قائم ہوں گے۔

آرمی ایکٹ ترمیمی بل سینیٹ سےکثرت رائے سے منظور

اس پروگرام کے تحت لاکھوں نوجوانوں کوفنی مہارت دی جائے گی اور تربیت پانے پر نوجوانوں کو بین الاقوامی اجازت نامے بھی ملیں گے۔

وزیر اعظم نے کہا کہ تعلیمی اداروں اور صنعت میں مضبوط روابط کی اشد ضرورت ہے۔ تکنیکی اور پیشہ وارانہ تعلیم کے اداروں کو عالمی اداروں سے منسلک کرنا ہوگا، درپیش مسائل کا حل ٹیکنالوجی کو بروئے کار لانے میں پوشیدہ ہے۔

اجلاس میں وزیر اعظم نے تکنیکی اداروں میں اعلیٰ معیار کو یقینی بنانے کی اہمیت پر زور دیتے ہوئے کہا کہ نوکریوں کے حصول میں دشواری سے تکنیکی اداروں کے معیار پر سوال اٹھتا ہے، جدید علوم اور آرٹیفشل انٹیلی جنس پر خصوصی توجہ دی جائے۔

انہوں نے مزید کہا کہ نوجوان ملکی تعمیر و ترقی میں بھرپور کردار ادا کریں گے۔ چاہتے ہیں نوجوان عالمی اداروں میں صلاحیتوں کا مؤثر استعمال کریں۔

یاد رہے کہ ہنر مندی کا منصوبہ کامیاب جوان پروگرام کے بینر تلے شروع ہوگا۔