بینکنگ کورٹ نے پیپلزپارٹی پنجاب کے صدر عزیز الرحمان چن کی جائیدادیں نیلام کرنے کا حکم دے دیا ہے۔

تفصیلات کے مطابق عزیز الرحمان چن اور انکے بھائیوں کی جائیدادیں نیلام کرنے کیلئے 2 نومبر کی تاریخ مقرر تھی، بنکنگ عدالت سے جے ایس بینک کیخلاف درخواستیں مسترد ہونے پر نیلامی کی تاریخ مقرر کی گئی۔

بینکنگ عدالت کے جج ندیم گلزار نے عزیز الرحمان چن سمیت دیگر کی درخواستوں پر تحریری حکم جاری کیا۔

عدالت میں جے ایس بینک کی طرف سے مینجر لیگل افنان ملک ایڈووکیٹ پیش ہوئے۔

بینک کے وکیل نے عدالت میں اپنا موقف اختیار کرتے ہوئے کہا کہ عزیز الرحمان چن نے کاروبار کیلئے قرض حاصل کیا مگر بینک کو ادائیگی نہیں کی۔ ڈیفالٹر نے ثریا جبین پارک باغبانپورہ میں واقع 11 مرلے کا گھر رہن رکھوایا تھا اور انہوں نے رنگ روڈ کے قریب واقع 13 کنال کی فیکٹری بھی رہن رکھوائی۔

وکیل نے کہا کہ عزیز الرحمان چن اور انکے بھائیوں نے بھوگیوال روڈ پر واقع 22 کنال 15 مرلے کی صنعت بھی رہن رکھوائی، ڈیفالٹر جلیل الرحمان نے بھی بھوگیوال روڈ پر واقع 6 کنال صنعتی اراضی رہن رکھوائی۔

انہوں نے کہا کہ عدالت میں نیلم سینما چوک کے پاس 9 مرلے کا گھر بھی رہن رکھوایا گیا، قرض کیلئے جلیل الرحمان، میاں اقبال، افشاں اقبال اور عزیز الرحمان چن نے گارنٹی بھی دی۔

وکیل نے عدالت میں استدعا کی کہ جائیدادوں پر جاری حکم امتناعی اور عزیز الرحمن چن کی درخواستیں مسترد کی جائیں، بینک نے فنانشل انسٹی ٹیوشن آرڈیننس کی دفعہ 15 کے تحت جائیدادیں نیلام کرنے کی اجازت کی استدعا کی تھی۔

عزیز الرحمان چن کے وکیل نے موقف دیا کہ جے ایس بینک سے کاروبار کیلئے قرض لیا تھا جو واپس کر دیا۔

دوسری جانب پی پی رہنما کے وکیل نے عدالت میں موقف اختیار کیا کہ بینک نے رہن شدہ جائیدادوں کی بلاجواز نیلامی کی کارروائی شروع کی۔

وکیل نے استدعا کی کہ بینک کو فنانشل انسٹی ٹیوشن آرڈیننس کی دفعہ 15 کے تحت جائیدادیں نیلام کرنے سے روکا جائے۔