پی ٹی آئی کی جانب سے راولپنڈی اور اسلام آباد میں بھرپور احتجاج کرنے کا فیصلہ کیا گیا ہے جس کے لئے جامع حکمتِ عملی تیار کرلی گئی ہے جبکہ عہدیداران کو ذمہ داریاں تفویض کردی گئیں  ہیں۔

مقامی قیادت اور اراکین قومی و صوبائی اسمبلی کی قیادت میں شہر کے داخلی و خارجی راستوں پر بھرپور احتجاج کیا جائے گا اور چیئرمین تحریک انصاف کی کال پر آج چار مقامات پر بڑے احتجاجی مظاہرے کئے جائیں گے ۔

علاوہ ازیں تحریک انصاف کے کارکنان  فیض آباد کے مقام پر بڑا احتجاجی مظاہرہ کریں گے  جبکہ دوسرا بڑا احتجاجی مظاہرہ جی ٹی روڈ پر روات کے مقام پر کیا جائے گا ۔

اسکے علاوہ مری ایکسپریس وے پر سلکھیتر کے مقام پر بھی بڑے احتجاجی مظاہرے کی تیاریاں مکمل کرلی گئیں ہیں جبکہ جی ٹی روڈ ٹیکسلا کے مقام پر بھی بہت بڑا احتجاجی مظاہرہ کیا جائے گا تاہم تمام مقامات پر بھرپور احتجاج کیلئے انتظامی کمیٹیاں تشکیل دے دی گئیں ۔

خیال رہے کہ گزشتہ روز سماجی رابطے کی ویب سائٹ ٹوئٹر پر اپنے ایک پیغام میں اسد عمر نے کہا ہ ہر شہر کی احتجاج کی جگہ کا اعلان مقامی تنظیمیں کریں گی۔

انہوں نے کہا کہ ان کو دکھائیں حقیقی طور پر آزاد قوم کو کوئی دبا نہیں سکتا۔

ان کا مزید کہنا تھا کہ میں خود لبرٹی چوک لاہور میں احتجاج میں شرکت کروں گا۔

پی ٹی آئی کے رہنماؤں کیخلاف مقدمات درج

گزشتہ روز پاکستان تحریک انصاف کی کال پر عمران خان سے اظہار یکجہتی کے لئے ملک گیر احتجاج کیا گیا تھا جس میں بڑی تعداد میں پارٹی رہنماؤں سمیت عوام اور کارکنان شامل تھے۔

احتجاج کے دوران مختلف شہروں سے پی ٹی آئی رہنماؤں کی گرفتاری بھی عمل میں آئی ہے جبکہ ان کے خلاف مقدمات بھی درج کرلئے گئے ہیں۔

اسلام آباد پولیس کی مدعیت میں 24 نامزد ملزمان کے خلاف تھانہ آئی نائن میں مقدمہ درج کر لیا گیا جس میں علی احمد اعوان ، عامر محمود کیانی ، واصف قیوم سمیت چودھری شعیب کے نام شامل ہیں۔

درج مقدمات کے مطابق ملزمان نے پولیس کے ساتھ مزاحمت کی اور سرکاری املاک کو نقصان پہنچایا، ملزمان نے پولیس اور ایف سی اہلکاروں پر ڈنڈوں سوٹوں پتھروں سے حملہ کیا جس میں نو ایف سی پانچ پولیس ملازمین زخمی ہوئے ہیں۔