گورنمنٹ کالج (جی سی) یونیورسٹی لاہور کے تعلیمی سفر کے 159  سال مکمل ہوگئے۔

گورنمنٹ کالج (جی سی) یونیورسٹی لاہور کے تعلیمی سفر کے 159  سال مکمل  ہونے پر فاؤنڈرز ڈے کی تقریب کا انعقاد کیا گیا۔

وائس چانسلر پروفیسرڈاکٹر اصغر زیدی نے صوبائی مشیر برائے داخلہ عمر سرفراز چیمہ کے ہمراہ فاؤنڈرز ڈے کا کیک کاٹا۔

وائس چانسلر پروفیسر ڈاکٹر اصغر زیدی  نے تقریب سے خطاب کرتے ہوئے کہا کہ  سال کا یہ وقت خود احتسابی کا وقت ہوتا ہے۔ ہم نے دیکھنا ہے کہ پچھلے سال میں کیا حاصل کیا اور اگلے سال کا لائحہ عمل کیا ہو گا۔

مزید پڑھیں: سردی کی شدت میں اضافہ؛ حکومت نے لمبی چھٹیوں کا اعلان کردیا

پروفیسر ڈاکٹر اصغر زیدی نے کہاکہ 2022 میں جی سی یونیورسٹی میں 1.8 بلین روپے کے ترقیاتی منصوبوں کا آغاز ہوا۔ اگلے سال یونیورسٹی اپنے بجٹ سے طلباء کے لیے سہولیات کو بہتر کرنے کے لیے 400 ملین روپے کے پروجیکٹس کا آغاز کر رہی ہے۔

ان کا مزید کہنا تھا کہ  ہم اپنے تعلیمی اور تحقیقی معیار کو مزید بہتر کرنے کے تجدید عہد کے ساتھ 2023ء میں داخل ہو رہے ہیں۔

اس موقع پر   یونیورسٹی کے انتظامی اور تدریسی شعبہ جات کے صدور نے اپنے شعبہ جات کی رپورٹس  بھی پیش  کیں۔

مزید پڑھیں: کیمبرج ڈکشنری میں مرد اور عورت سے متعلق بڑی تبدیلی کا اعلان

صوبائی مشیر برائے داخلہ عمر سرفراز چیمہ   نے تقریب سے خطاب کرتے ہوئے کہا کہ  اپنی مادر علمی کی ترقی دیکھ کر بے حد خوشی ہوئی۔ کسی بھی ادارے کی ترقی کے لیے اچھی لیڈرشپ بہت ضروری ہے۔

یاد رہے کہ  گورنمٹ کالج نے یکم جنوری 1864ء کو اندرونِ لاہور میں دھیان سنگھ کی حویلی میں آنکھ کھولی تھی اور اس کی  پہلی کلاس صرف 9طلباء پر مشتمل تھی۔