میکسیکو کے بدنام زمانہ اسمگلر اوویڈیو گوزمین المعروف ’دی ماؤس‘ کی گرفتاری کے بعد اس کے ساتھیوں نے 29 افراد کو ہلاک کر دیا ہے۔

غیر ملکی میڈیا کے مطابق میکسیکو کے بدنام زمانہ منشیات کے اسمگلر اوویڈیو گوزمین المعروف ’دی ماؤس‘ کی گرفتاری کے بعد اس کے ساتھیوں نے 3 سیکیورٹی اہلکاروں سمیت 29 افراد کو ہلاک کر دیا ہے۔

واضح رہے کہ اوویڈیو گوزمین بین الاقوامی منشیات اسمگلر ایل چاپو کے بیٹے ہیں، ایل چاپو منشیات کی دنیا میں ’گاڈ فادر‘ کے نام سے جانے جاتے ہیں۔

ایل چاپو گینگ کے سربراہ تھے انہیں تین بار میکسیکو کی پولیس نے گرفتار کیا اور تینوں مرتبہ وہ جیل سے فرار ہونے میں کامیاب ہو گئے تھے، میکسیکو پولیس نے 2016 میں ایل چاپو کو گرفتار کر کے امریکہ بھیج دیا تھا۔

غیر ملکی میڈیا کے مطابق ایل چاپو کی گرفتاری کے بعد ان کے بیٹے 32 سالہ اوویڈیو گوزمین نے اپنے والد کی جگہ لی اور منشیات کی اسمگلنگ کا کاروبار سنبھالا، اوویڈیو گوزمین جرائم کی دنیا میں ’دی ماؤس‘ کے نام سے مشہور ہیں۔

ایل چاپو کے بعد ان کے بیٹے اوویڈیو گوزمین نے زیرزمین دنیا میں اپنی دھاک بٹھائی اور عام شہری بھی ان کے نام سے خوفزدہ تھے۔

گوزمین پر مخبروں، مخالف گینگ کے کارندوں اور ایک معروف گلوکار کے قتل کرنے کا الزام بھی ہے، گلوکار نے ان کی شادی میں گانا گانے سے منع کر دیا تھا۔

اوویڈیو گوزمین نے 2019 میں رہا ہونے کے بعد اپنے خفیہ ٹھکانے سے منشیات کی اسمگلنگ کے کام کو مزید تیز کر دیا تھا، پولیس نے 6 مہینے کی خفیہ نگرانی کے بعد اسے گرفتار کر لیا۔

اوویڈیو گوزمین کی گرفتاری کے وقت بھی اس کے گینگ نے کافی مزاحمت کی تھی جس میں ایک پولیس اہکار ہلاک اور 21 افراد زخمی ہوئے تھے۔

اوویڈیو گوزمین کی گرفتاری کی خبر میکسیکو میں جنگل کی آگ کی طرح پھیل گئی اور جیسے ہی یہ خبر اوویڈیو کے آبائی صوبے سینالوا میں پہنچی تو گوزمین کے لیے کام کرنے والے جرائم پیشہ افراد کے گروہ نے پُرتشدد کارروائیوں کا بازار گرم کر دیا۔

اوویڈیو گوزمین کی گینگ کے مسلح افراد نے سینالوا کے مختلف علاقوں کو اپنا ہدف بنا لیا ہے جہاں عام شہریوں کو فائرنگ کا نشانہ بنایا جا رہا ہے۔

اوویڈیو گوزمین کے ساتھیوں نے ایک ہوائی اڈے پر بھی دھاوا بولا اور لینڈنگ اور ٹیک آف کرنے والے مسافر طیاروں پر فائرنگ کی۔