سابق وزیراعظم اور چیئرمین پی ٹی آئی عمران خان کی قومی اسمبلی میں ممکنہ واپسی کے اعلان کے بعد مسلم لیگ ن متحرک ہوگئی ہے۔

اس حوالے سے ذرائع کا کہنا ہے کہ پاکستان مسلم لیگ ن کی جانب سے عمران خان کی قومی اسمبلی میں واپسی کو روکنے کے لئے اہم مشاورتی اجلاس طلب کرلیا گیا ہے۔

اجلاس میں صدارت وزیراعظم شہباز شریف کریں جبکہ اتحادیوں سے بھی اس معاملے پر مشورہ کیا جائیگا۔

اجلاس کے دوران تحریک انصاف کی واپسی کو روکنے کے لئے ممکنہ اقدامات پر غور کیا جائیگا جس میں استعفوں کی منظوری بھی شامل ہے۔

یہ بھی پڑھیں: قومی اسمبلی میں واپسی اور اعتماد کے ووٹ کا پلان، عمران خان نے آج اہم اجلاس طلب کرلیا

علاوہ ازیں استعفے منظور نہ بھی کریں تو مسلسل چالیس روز اسمبلی سے غیر حاضری پر کارروائی ہو سکتی ہے اور اسپیکر قومی اسمبلی پی ٹی آئی ارکان کو ڈی سیٹ کر سکتے ہیں۔

خیال رہے کہ گزشتہ روز پاکستان تحریک انصاف کے چیئرمین عمران خان نے سینئر صحافیوں سے گفتگو کرتے ہوئے کہا کہ قومی اسمبلی کے حوالے سے پلان کرلیا ہے، شہباز شریف کی نیندیں اڑنے والی ہیں، یہ بری طرح پھنس گئے ہیں کیوں کہ رات ان کو پیٹرول کی قیمت میں اضافہ کرنا تھا لیکن نہیں کرسکے اور اب آئی ایم ایف سے ان کے مذاکرات کامیاب نہیں ہوں گے۔

عمران خان کا کہنا تھا کہ مسلم لیگ (ن) کے ایم این ایز ہم سے رابطے میں ہیں، پہلے ان کا ٹیسٹ ہوگا پھر ان کو پارٹی میں شامل کریں گے جب کہ قومی اسمبلی میں نگران سیٹ اپ کیلئے واپس جاسکتے ہیں۔

ایک سوال کے جواب میں انہوں نے کہا کہ سابق آرمی چیف جنرل ریٹائرڈ باجوہ ڈاکٹرائن میں کوئی کمی نہیں آئی جب کہ پی تی آئی کی کراچی میں ہارنے کی وجہ تنظیم کی کمزوری اور پیپلزپارٹی کی دھا ندلی ہے۔

علاوہ ازایں سابق وزیراعظم نے بول نیوز کے اینکرپرسن اسامہ غازی سے ملاقات کی۔ اس دوران انہوں نے کہا کہ مارچ یا اپریل میں عام انتخابات دیکھ رہا ہوں اور اگر واضح اکثریت نہ ملی تو مخلوط حکومت نہیں بناوں گا۔

عمران خان نے مزید کہا کہ ملک کے موجودہ حالات کا حل مضبوط حکومت کرسکتی ہے، ماضی کو چھوڑ کر مفاہمت کی طرف جانا چاہئے۔