وزیراعظم عمران خان نے کہا ہے کہ ڈیجیٹل پاکستان کا مقصد نوجوانوں کو اقتصادی ترقی کے محرک بننے اور انہیں خود مختار بنانے کےلئے پلیٹ فارم مہیا کرنا ہے۔

تفصیلات کے مطابق وزیراعظم عمران خان سے ملٹی نیشنل ٹیلی کمیونیکیشن سروسز کمپنی وی آن کے چیف آپریشنز آفیسر سرگی ہیریرو نے ملاقات کی۔

 اس موقع پر عمران خان نے وی آن کے پاکستان کےساتھ طویل تعلق کوسراہا  اور کہا کہ وی آن نے پاکستان میں 9 ارب ڈالر کی سرمایہ کاری کی نے 9 ارب ڈالر کی سرمایہ کاری کی ہے اور اپنی کثیر الجہتی خدمات کے ساتھ 6 کروڑ صارفین کو سروسز فراہم کررہی ہے۔

وزیراعظم نے کہا کہ پاکستان میں مواصلات اور توانائی کے شعبوں میں سرمایہ کاری کے وسیع مواقع موجود ہیں، حکومت کاروبار کو آسان بنانے پر اپنی توجہ مرکوز کئے ہوئے ہے اور اس نے آزاد سرمایہ کاری پالیسی اختیار کی ہے جس کو بین الاقوامی مالیاتی اداروں کی طرف سے سراہا جا رہا ہے۔

عمران خان نے  یہ بھی کہا کہ موجودہ حکومت نے ”ڈیجیٹل پاکستان“ کا منصوبہ شروع کیا جس کا مقصد نوجوانوں کو ایک پلیٹ فارم مہیا کرنا ہے تاکہ وہ آزادانہ طور پر کام کرکے ملک کی اقتصادی ترقی میں اپنا کردار بھرپور طریقہ ادا کر سکیں۔

وزیراعظم کا کہنا تھا کہ حکومت ڈیجیٹل پالیسی کے تحت پاکستان کی آئی سی ٹی انڈسٹری کا حجم آئندہ چند سالوں کے دوران 20 ارب ڈالر تک بڑھانا چاہتی ہے۔

وزیراعظم عمران خان کا  مزید کہنا تھا  کہ اس پالیسی کے تحت آئی ٹی کے شعبہ میں نوجوانوں کو ڈیجیٹل خدمات میں جدت لانے اور اس شعبہ میں اپنا کردار ادا کرنے کیلئے انفراسٹرکچر اور ادارہ جاتی فریم ورک کے ساتھ ڈیجیٹل ایکو سسٹم فراہم کیا جا رہا ہے۔

اس موقع پر کمپنی کے چیف آپریشنز آفیسر سرگی ہیریرو نے وزیراعظم اور ان کی حکومت کی طرف سے ٹیلی کام کمپنیوں کو کام کرنے کا مسابقتی اور شفاف ماحول فراہم کرنے پر ان کا شکریہ ادا کیا۔

 کمپنی کے چیف آپریشنز آفیسر نے بتایا کہ جاز پاکستان نے ”انٹرنیٹ سب کیلئے“ کی مہم شروع کی ہے جس کے تحت سوشل میڈیا، جاز کیش اور وزیراعظم سٹیزن پورٹل کیلئے قابل استطاعت موبائل فون اور انٹرنیٹ کی رسائی فراہم کی جا رہی ہے۔

حکومت کی جانب سے پٹرول اور گیس صارفین کے لئے خوشخبری

سرگی ہیریرو نے کہا کہ اس سروس کی فراہمی کے ذریعے شہریوں کو چھوٹی اور درمیانی درجے کی اقتصادی سرگرمیاں کو انجام دینے کے قابل بنانے اور گورننس کو بہتر بنانے میں بھی مدد ملے گی۔

کمپنی کے چیف آپریشنز آفیسر سرگی ہیریرو نے حکومت کی طرف سے جعلی خبروں کی روک تھام کیلئے کئے جانے والے اقدامات کو سراہتے ہوئے کہا کہ جعلی خبروں کے ذریعے غیر یقینی صورتحال اور خوف و ہراس پیدا کرنا سرمایہ کاری کیلئے تباہ کن ہے۔

ملاقات میں چیئرمین سرمایہ کاری بورڈ کے چیئرمین سیّد زبیر حیدر گیلانی، پی ٹی اے کے چیئرمین میجر جنرل (ر) عامر عظیم باجوہ اور وزیراعظم کی ڈیجیٹل پاکستان کیلئے فوکل پرسن تانیہ ادروس بھی اس موقع پر موجود تھیں۔