وفاقی وزیر برائے ریلوے خواجہ سعد رفیق نے کہا ہے کہ جیل بھرو تحریک میں سب سے پہلے لیڈر کو جیل جانا چاہیے۔

لاہور میں وفاقی وزیر خواجہ سعد رفیق نے میڈیا سے بات کرتے ہوئے کہا کہ سیاسی کارکنان کے جیل جانے کی حمایت نہیں کرسکتا، سب سے پہلے لیڈر کو جیل جانا چاہیے۔

پرویز الہٰی اور عمران خان کو مبارک ہو ایک جیسے اکٹھے ہوگئے

انہوں نے کہا کہ  میں ہوتا تو کبھی گرفتاری کے لیے پولیس کھڑی نہ کرتا خود ہی گھوم کر گھر چلے جاتے ، عمران خان خود ضمانت کراتے ہیں اور دوسروں کو جیلوں میں جانے کا کہہ رہے ہیں۔

سعد رفیق نے کہا کہ عمران خان پرویز الہٰی کو برے برے لقب دیتے تھے، گالیاں بھی دیتے تھے اور وقت آنے پر سینے سے بھی لگا لیتے ہیں، جن کو گالیاں دیتے ہیں ضرورت کے وقت سر پر بٹھا لیتے ہیں۔

وفاقی وزیر نے کہا کہ پرویز الہٰی اور عمران خان کو مبارک ہو ایک جیسے اکٹھے ہو گئے۔

عمران خان پر کسی کو اعتبار نہیں

انکا کہنا ہے کہ شاہد خاقان عباسی بہت پیشیاں بھگت چکے ہیں، کل شاہد خاقان لیٹ ہو گئے تو وارنٹ نکل گئے۔

انہوں نے کہا کہ  عمران خان پر کسی کو اعتبار نہیں، سب کو پتا ہے عمران خان کو موقع ملا تو گند ڈالے گا۔

خواجہ سعد رفیق نے کہا کہ سیاسی انتقام نہیں ہونا چاہیے، نہیں چاہتے جو ہمارے ساتھ ہوا ان کے ساتھ بھی ہو، عمران خان کے ساتھ تو ابھی کچھ ہوا ہی نہیں۔

یہ بھی پڑھیں: ملک بھر میں انتخابات ایک ساتھ ہونے چاہئیے، خواجہ سعد رفیق

انہوں نے کہا کہ نواز شریف اس بھگوڑے کی طرح نہیں ہیں، لمبی جیل کاٹ کر گئے، سیاسی انتقام کے خاتمے کے لیے حکومتوں کو طبی عمر پوری کرنے دینا چاہیے۔

وفاقی وزیر نے مزید کہا کہ ریاست کے خلاف کھیل کھیلنے والوں کے ساتھ قانونی کارروائی ہونی چاہیے، عمران خان نے کیا اپنے گریبان میں جھانکا ہے۔ ہم چاہتے ہیں کہ نواز شریف آئیں کہ نظام عدل پر اعتبار ہونا چاہیے۔