دورہ آسٹریلیا کے لیے حارث رؤف اور محمد نواز کی سلیکشن خطرے میں پڑگئی ہے جب کہ قومی ٹیم میں تبدیلیوں کا امکان ظاہر کیا جارہا ہے۔

پاکستان کرکٹ ٹیم دورہ آسٹریلیا کے لیے 30 نومبر کو اسلام آباد سے روانہ ہوگی جب کہ اس دوران تین ٹیسٹ میچز پر مشتمل سیریز کھیلی جائے گی۔

ٹیسٹ سیریز سے قبل قومی ٹیم کا پریکٹس میچ پرائم منسٹر الیون سے ہوگا جو 6 سے 9 دسمبر تک کینبرا کے مانوکا اوول میں کھیلا جائے گا۔

پاکستان کرکٹ ٹیم 14 دسمبر کو پرتھ میں آسٹریلیا کے خلاف پہلا ٹیسٹ کھیلے گی جب کہ دوسرا ٹیسٹ 26 سے 30 دسمبر تک میلبرن کرکٹ گراؤنڈ میں کھیلا جائے گا اور تیسرا و آخری ٹیسٹ 3 جنوری 2024 کو سڈنی میں ہوگا۔

دورہ آسٹریلیا کے اسکواڈ کو حتمی شکل دینے کے لیے چیف سلیکٹر وہاب ریاض نے ٹیم ڈائریکٹر محمد حفیظ اور کپتان شان مسعود سے مشاورت مکمل کرلی ہے۔

میڈٰیا رپورٹس کے مطابق پی سی بی مینجمنٹ کمیٹی کے چیئرمین ذکاء اشرف کی جانب سے اسکواڈ کی منظوری کا انتظار ہے جب کہ قومی ٹیم میں ایک یا دو تبدیلیاں کی گئی ہیں۔

میڈٰیا رپورٹس میں دعویٰ کیا گیا ہے کہ سری لنکا کے خلاف ٹیسٹ سیریز میں کلین سوئپ کرنے والے اسکواڈ کو ہی برقرار رکھنے کا امکان ہے جب کہ انجری کے شکار نسیم شاہ کی جگہ میر حمزہ اور خرم شہزاد کو اسکواڈ میں شامل کیا جاسکتا ہے۔

آسٹریلوی کنڈیشن کو سامنے رکھتے ہوئے ایک اضافی فاسٹ بولر کو اسکواڈ کا حصہ بنایا جاسکتا ہے جب کہ ورلڈکپ میں ناقص کارکردگی دکھانے والے حارث رؤف اور محمد نواز کی شرکت مشکوک دکھائی دے رہی ہے۔

واضح رہے کہ قائد اعظم ٹرافی میں خرم شہزاد سب سے زیادہ 36 وکٹیں حاصل کرنے والے بولر ہیں جب کہ میر حمزہ نے دوسرے نمبر پر سب سے زیادہ 32 وکٹیں حاصل کیں تھیں۔