لاہور: جہانگیر خان جونیئر ہاکی ورلڈکپ میں جانے والی ٹیم کی حوصلہ افزائی کرنے کے لیے تقریب میں پہنچ گئے ہیں۔

جونیئر ہاکی ورلڈکپ میں شرکت کے لیے ملائیشیا جانے والی پاکستان جونئیر ہاکی ٹیم کے اعزاز میں الوداعی تقریب منعقد کی گئی جس میں پاکستان ہاکی فیڈریشن (پی ایچ ایف) کے صدر خالد سجاد کھوکھر اور سیکرٹری رانا مجاہد سمیت دیگر عہدیداران کی شرکت کی۔

سابق کپتان صلاح الدین صدیقی اور سابق اسکواش عالمی چیمپئن جہانگیر خان بھی ٹیم کو الوداع کرنے پہنچ گئے۔

اس موقع پر سابق اسکواش عالمی چیمپئن جہانگیر خان کا کہنا تھا کہ ورلڈکپ کے لیے ٹیم کو الوداع کرنا اعزاز ہے، جونییر کی سطح سے ہی خود مستحکم کرنا چاہیے۔ مجھے بھی جونیئر کی سطح پر موقع ملا اور فائدہ اٹھایا۔

سابق کپتان صلاح الدین صدیقی کہتے ہیں فوکس اس میچ پر رکھیں جو آپ نے کھیلنا ہے اور جو مواقع ملیں وہ ضائع نہ ہونے دیں، ٹیم ورک کے ساتھ کھیلیں اور فٹنس کو اولین ترجیح دیں۔

پاکستان ہاکی فیڈریشن کے سیکرٹری رانا مجاہد نے کہا کہ جہانگیر خان الوداع کرنے کے لیے آئے ہیں اور یہ ہمارے لیے اعزاز ہے۔

سیکریٹری پی ایچ ایف نے کہا ہم نے مشکل حالات میں بہت کام کرنے کی کوشش کی ہے، امید ہے کہ نوجوان کھلاڑی اچھے کھیل کامظاہرہ کریں گے۔

پاکستان ہاکی فیڈریشن کے صدر خالد سجاد کھوکھر نے کہا کہ پاکستان جونیئر ہاکی ٹیم میں کوئی کمی نہیں، آپ نوجوان کھلاڑی ہاکی کو پاکستان میں بحال کرسکتے ہیں، پاکستان جونیئر ہاکی ٹیم سے بڑی امیدیں ہیں۔

انہوں نے مزید کہا کہ پیسوں کے لیے ہر دروازے کھٹکھٹا رہے ہیں اور کوشش ہے کہ جانے سے قبل آپ کو ادائیگیاں کی جائیں۔ آپ کو ایک ایک پائی ادا کی جائے گی بس کھیل پر فوکس رکھیں اور ہماری ہر ممکن کوشش ہے کہ سب اکٹھے پیسے ادا کر دیے جائیں۔