الیکشن کمشنر پنجاب اعجاز انور چوہان نے کہا ہے کہ شفاف انتخابات کے انعقاد میں کسی قسم کی غفلت برداشت نہیں کی جائے گی۔

صوبائی الیکشن کمشنر اعجاز انور چوہان نے عام انتخابات کے حوالے سے اپنے ایک پیغام میں کہا کہ صوبہ پنجاب کے 144قومی اور 297صوبائی اسمبلی کے حلقوں میں پولنگ کا عمل جاری ہے، ووٹرز بلا خوف و خطر اپنا حق رائے دہی استعمال کریں۔

انہوں نے کہا کہ سیکیورٹی کے فول پروف انتظامات کیے گئے ہیں،پولنگ کاعمل صبح 8 تا 5 بجے تک بلا تاخیر جاری رہے گا، پنجاب کے 7 کروڑ 42 لاکھ 90 ہزار 9 سو 24رجسٹرڈ ووٹرز کیلئے 51ہزار پولنگ اسٹیشنز قائم کیے گئے ہیں۔

انکا کہنا تھا کہ انتظامیہ، پولیس اور متعلقہ ادارے غیر جانبدارانہ انتخابات کے انعقاد کو یقینی بنائیں، شفاف انتخابات کے انعقاد میں کسی قسم کی غفلت برداشت نہیں کی جائے گی۔

اعجاز انور چوہان نے مزید کہا کہ شفاف انتخابات کیلئے تمام وسائل بروئے کار لائے جائیں گے، ووٹرز کی شکایات کے فوری ازالے کیلئے تمام کنٹرول رومز فعال ہیں۔

واضح رہے کہ پاکستان بھر میں عام انتخابات 2024 کے لیے پولنگ کے عمل کا آغاز ہوگیا ہے، تاہم پولنگ کا عمل بغیر کسی وقفے کے صبح 8 بجے سے شام 5 بجے تک جاری رہے گا۔

قومی اور چاروں صوبائی اسمبلیوں کے 855 حلقوں کیلئے 12 کروڑ 79 لاکھ سے زیادہ رجسٹرڈ ووٹرز اپنا حق رائے دہی استعمال کریں گے جبکہ ان انتخابات میں ملک کی انتخابی تاریخ میں سب سے زیادہ امیدوار حصہ لے رہے ہیں جن کی تعداد 17 ہزار  سے زائد ہے جن میں 11 ہزار سے زائد آزاد امیدوار ہیں۔

ملک بھر میں 90 ہزار 675 میں سے 46 ہزار 65 پولنگ اسٹیشنز کو حساس و انتہائی حساس قرار دیا گیا ہے جبکہ شفاف پولنگ کے لیے مختلف شہروں میں مانیٹرنگ سیلز قائم کیے گئے ہیں۔