ماہرین نے دن بھر میں سونے، بیٹھنے، چلنے اور کھڑے رہنے کے اوقات کار کئی مطالعے کے بعد مقرر کیے ہیں تاکہ صحت کو بہتر بنایا جاسکے۔ تاہم حال ہی میں کی جانے والی ایک نئی تحقیق کے مطابق بہتر صحت کے لیے ضروری ہے کہ روزانہ کسی نہ کسی جسمانی سرگرمی میں پورے چار گھنٹے صرف کیے جائیں۔

آسٹریلیا کی سوین برن یونیورسٹی آف ٹیکنالوجی کے محققین نے 24 گھنٹے کی مدت میں 2,000 افراد کے رویے کا تجزیہ کیا کہ انہوں نے کتنا وقت کونسی کونسی سرگرمیوں میں صرف کیا تاکہ زیادہ سے زیادہ صحت کے لیے جسمانی سرگرمی اور آرام کے صحیح امتزاج کا تعین کیا جا سکے۔

تاہم بھر پور صحت کے لیے 24 گھنٹے میں آٹھ گھنٹے کی نیند، پانچ گھنٹے کھڑے رہنا، چھ گھنٹے بیٹھنے اور چار گھنٹے ہلکی اور اعتدال پسند جسمانی سرگرمی کی یہ تقسیم سب سے بہتر قرار دی گئی، جس نے گلیسیمک کنٹرول کو برقرار رکھنے اور دل کی صحت کو فروغ دینے میں اہم کردار ادا کیا۔

اعتدال سے بھرپور جسمانی سرگرمی میں تیز چہل قدمی یا سائیکل چلانا، جاگنگ، جمپنگ اور ایروبک ڈانس شامل ہوسکتا ہے، جب کہ ہلکی جسمانی سرگرمی میں پیدل چلنے سے لے کر کھانا پکانے اور گھریلو کام کاج مکمل کرنے سے لے کر اونچی آواز میں ہنسنا بھی ہوسکتا ہے۔

سوئن برن کی ٹیم مجموعی صحت کو برقرر رکھنے کے لیے رات میں آٹھ گھنٹے اور 20 منٹ کی نیند لینے کی سفارش کرتی ہے، اور اس سے کم یا زیادہ دورانیے کی نیند سے گریز کرنا چاہیے۔

یہ تحقیق دراصل بیماریوں کے کنٹرول اور روک تھام کے مراکز کی رائے کی عکاسی کرتی ہے، جو لوگوں کو فی رات کم از کم سات گھنٹے کی نیند لینے کا مشورہ دیتی ہے۔

اگرچہ نیند کی کمی کے خطرات کو ماضی کی بہت سی تحقیق سے ثابت کیا جاچکا ہے تاہم رات میں نو گھنٹے سے زیادہ سونا فالج خطرے کوبڑھا دیتا ہے۔

اس تحقیق کے دوران محققین نے یہ بھی نوٹ کیا کم وقت کے لیے بیٹھنا اور زیادہ وقت کھڑے ہوکر گزارنا، جسمانی سرگرمی میں وقت صرف کرنا، اور پرسکون نیند لینا کارڈیو میٹابولک صحت کو بہتر بناتا ہے۔ اوریہی وجہ ہے کہ آپ کی مجموعی صحت کسی ایک سرگرمی پر نہیں بلکہ 24 گھنٹے پر محیط ہے ۔