بیجنگ: پاکستان اور چین کے درمیان 32 مفاہمتی یادداشتوں اور معاہدوں پر دستخط ہوگئے ہیں۔

وزیراعظم محمد شہبازشریف نے آج گریٹ ہال آف دی پیپل میں چین کے وزیراعظم عزت مآب لی چیانگ سے وفود کی سطح پر ملاقات کی جب کہ وزیراعظم کے ہمراہ ان کی کابینہ کے اہم ارکان بھی موجود تھے۔

گریٹ ہال آف دی پیپل پہنچنے پر وزیراعظم کے اعزاز میں استقبالیہ تقریب کا اہتمام کیا گیا اور انہیں پیپلز لبریشن آرمی کے دستے کی جانب سے گارڈ آف آنر پیش کیا گیا۔

ملاقات کے دوران دونوں رہنماؤں نے دو طرفہ تعلقات کے تمام پہلوؤں پر تبادلہ خیال کیا اور باہمی دلچسپی کی علاقائی اور عالمی پیش رفت پر بھی بات چیت کی۔

دونوں رہنماؤں نے اس امر پر اطمینان کا اظہار کیا کہ پاک چین آل ویدر اسٹریٹجک کوآپریٹو پارٹنرشپ جو کہ باہمی اعتماد اور مشترکہ اصولوں پر مبنی ہے، وقت کو ساتھ مزید مضبوط ہو رہی ہے۔

چینی وزیراعظم نے وزیراعظم شہباز شریف کو اقوام متحدہ کی سلامتی کونسل کا غیر مستقل رکن منتخب ہونے پر مبارکباد بھی دی۔

32 معاہدوں پر دستخط

پاکستان اور چین کے درمیان آج مندرجہ ذیل مفاہمتی یادداشتوں اور معاہدوں پر دستخط کیے گئے۔

دونوں ممالک کے درمیان ٹیلی ویژن، فلم، ٹرانسپورٹ، انفراسٹرکچر، صنعت، زراعت، صحت، سماجی واقتصادی ترقی و باہمی دلچسپی کے دیگر شعبوں کی یادداشتوں اور معاہدوں پر دستخط ہوئے۔

پاکستان اور چین کے درمیان سی پیک میں تھرڈ پارٹی کی شراکت داری کے حوالے سے ضابطہ کارطے کرنے، ڈیرہ اسماعیل خان تا ژوب قومی شاہراہ 50، مظفر آباد تا میر پور خاص، میرپور خاص تا منگلا ایکسپریس وے، کراچی تا حیدر آباد موٹر وے 9 کے فزیبیلیٹی اسٹڈی کے حوالے سے مفاہمتی یادداشت پر دسخظ کیے گیے۔

 اس کے علاوہ مانسہرہ تا چلاس قومی شاہراہ 15 پر بابو سر کے مقام پر ٹنل کی تعمیر کے حوالے سے بھی مفاہمتی یادداشت پر دسخط ہوئے جبکہ قراقرم ہائی وے کی ری الائینمینٹ اور زراعت کے شعبے میں تعاون بڑھانے پر بھی دستخط کیے گیے۔

اس موقع پر 2022 کے صنعتی تعاون کے فریم ورک کے نفاز کے حوالے سے ایکشن پلان، سائنسی اور تکنیکی شعبوں میں سرویئنگ، میپنگ اور جیو انفارمیشن کے حوالے سے پروٹوکول، توانائی کے مؤثر مینجمنٹ سسٹم کے حوالے سے اسٹڈی اور اجارہ داری کے خاتمے میں تعاون کے حوالے سے مفاہمتی یادداشت پر بھی دستخط ہوئے۔

دونوں ملکوں کے درمیان گورننس کے شعبے میں استعداد کار بڑھانے کے حوالے سے ورکشاپ کا لیٹر آف انٹینٹ، انڈسٹریل پارک کی تعمیر کے حوالے سے ورکشاپ کا لیٹر آف انٹینٹ، ساتویں جوائنٹ ورکنگ گروپ کے سی پیک کے تحت صنعتی شعبے میں تعاون بڑھانے کے اتفاق کی توثیق، پاک چین دوستی اسپتال، گوادر کی حوالگی کا سرٹیفیکیٹ اور گوادر میں سمندری پانی کو میٹھا کرنے کے پلانٹ کی حوالگی کے سرٹیفیکیٹ پر دستخط کیے گئے۔

سندھ میں پرائمری اسکولوں کی دوبارہ تعمیر کا لیٹر آف ایکسچینج، لیڈی ہیلتھ ورکرز ورک اسٹیشن کے منصوبے کا لیٹر آف ایکسچینج اور جوناکو کلٹیویشن ڈیمانسٹریشن اینڈ پروجیکشن کے منصوبے کے لیٹر آف ایکسچینج پر دستخط کیے گئے۔