اسلام آباد: سینیٹر عرفان صدیقی کا کہنا ہے کہ فائنل کال کا بپھرا ہوا سونامی، اسلام آباد میں ناکامی کے بعد واپس لوٹ گیا ہے۔

سینیٹر عرفان صدیقی نے ایکس پر جاری بیان میں کہا کہ فائنل کال کا بپھرا ہوا سونامی، اسلام آباد کی دیواروں سے سر پھوڑنے کے بعد ناکام و نامراد واپس لوٹ گیا جب کہ جانباز کارکن اپنی موٹرسائیکل اور کاریں بھی چھوڑ کر بھاگ گئے ہیں۔

انہوں نے کہا کہ مرنے مارنے کے نعرے لگانے والے کچھ سیکیورٹی اہلکاروں کو مار کر، کچھ کارکنوں کو مروا کر، آدھی رات کو مارگلہ پہاڑوں کے جنگلوں میں گھری سڑک کے ذریعے فرار ہوگئے۔

سینیٹر عرفان صدیقی کا کہنا تھا کہ اب جھوٹ اور غلط بیانیوں کی فیکٹریاں کھلیں گی، لاشوں اور خونریزیوں کی بے بنیاد فرضی کہانیاں بنیں گی۔

انہوں نے لکھا کہ فائنل کال کی شرم ناک پسپائی لمبے عرصے تک پی ٹی آئی کو سر نہیں آٹھانے دے گی۔

سینیٹر نے مزید لکھا کہ ریاست کو فیصلہ کرنا ہوگا کہ کیا پی ٹی آئی سیاسی جماعت ہے یا لاقانونیت اور قتل و غارت گری کو اپنا ہتھیار سمجھنے والا بے مہار جتھہ؟۔

عرفان صدیقی نے سوال اٹھایا کہ کیا آئین کوئی حل دیتا ہے کہ جب ایک صوبائی حکومت سرکاری وسائل سے وفاق پر لشکر کشی کو معمول بنالے تو کیا کرنا چاہئے۔