پاکستان کرکٹ بورڈ (پی سی بی) محسن نقوی نے کہا کہ سوشل میڈیا پر منفی باتیں کرنے والے ہار گئے ہم جیت گئے ہیں۔

پی سی بی چیئرمین نیشنل اسٹیڈیم کراچی کی تعمیر نو میں حصہ لینے والے ورکرز کے اعزاز میں منعقد کی جانے والی تقریب سے خطاب کر رہے تھے۔

محسن نقوی نے اس عظیم پروجیکٹ کی تکمیل میں ورکرز کی محنت کو سراہتے ہوئے کہا کہ اس پروجیکٹ کے ہیرو آپ ورکرز ہیں، جنہوں نے دن رات محنت کی اور 18 گھنٹے کام کیا۔

محسن نقوی نے مزید کہا کہ تمام ورکرز مبارکباد کی مستحق ہیں، کیونکہ آپ کی محنت کی بدولت نیشنل اسٹیڈیم آج عالمی معیار کا بن چکا ہے۔

اس موقع پر انہوں نے نیشنل اسٹیڈیم کی تعمیراتی کامیابی کا ذکر کرتے ہوئے کہا کہ کراچی کی نئی بلڈنگ لاہور سے پہلے اور اچھی بنی ہے، اور اس کا اعتراف میں خود کرتا ہوں۔

چیئرمین پی سی بی نے نیشنل اسٹیڈیم کے ترقیاتی کاموں کا ذکر کرتے ہوئے کہا کہ اس پروجیکٹ کا آدھا کام ابھی باقی ہے۔ چمپئنز ٹرافی کے بعد نیشنل اسٹیڈیم کے باقی کاموں کا آغاز کیا جائے گا۔

انہوں نے اس بات کا بھی اعتراف کیا کہ نیشنل اسٹیڈیم کا منظر لاہور سے بہتر ہے اور پی سی بی کی ٹیم نے اس کی کامیابی کے لیے بہت کام کیا ہے۔

محسن نقوی نے پاکستان کرکٹ ٹیم کے حوالے سے کہا کہ ہمیں اپنی ٹیم پر بھروسہ ہونا چاہیے، اور ایک میچ سے مایوس نہیں ہو جانا چاہیے۔ اگر ٹیم محنت کرتی نظر آئے تو ہمیں ان کی داد دینی چاہیے۔

انہوں نے کپتان محمد رضوان اور پوری ٹیم پر مکمل اعتماد کا اظہار کرتے ہوئے کہا کہ مجھے رضوان اور پوری ٹیم پر مکمل اعتماد ہے، اور میں یقین رکھتا ہوں کہ وہ ہمیں مزید کامیابیاں دلائیں گے۔