وزیر اعظم شہباز شریف پاکستان، ترکیہ اور آذر بائیجان کے سہ فریقی اجلاس سے خطاب کریں گے، یہ خطاب پی ٹی وی پر براہ راست نشر کیا جائے گا۔

تفصیلات کے مطابق وزیراعظم شہباز شریف آج آذربائیجان کے شہر لاچین میں ایک مصروف سفارتی دن گزاریں گے، جہاں وہ اہم علاقائی و بین الاقوامی اجلاسوں اور تقاریب میں شرکت کریں گے۔

وزیراعظم شہباز شریف پاکستان-ترکیہ اور آذربائیجان کے سہ فریقی اجلاس میں شرکت کریں گے، جس میں تینوں برادر ممالک کے درمیان تعاون کے فروغ، تجارت، سیکیورٹی، اور علاقائی استحکام جیسے اہم امور پر تبادلہ خیال کیا جائے گا۔

مزید پڑھیں: وزیراعظم شہباز شریف کی سعودی ولی عہد سے ملاقات؛ اہم امور پر تبادلہ خیال

وزیراعظم اس موقع پر سہ فریقی اجلاس سے خطاب بھی کریں گے، جو پی ٹی وی نیوز پر براہ راست نشر کیا جائے گا۔

وزیراعظم کا خطاب پی ٹی وی پر پاکستان کے معیاری وقت کے مطابق دوپہر 2:45 بجے سے سہ پہر 3:45 بجے کے درمیان نشر کیا جائے گا۔

بعد ازاں، وزیراعظم شہباز شریف، ترکیہ اور آذربائیجان کے صدور کے ہمراہ آذربائیجان کے یومِ آزادی کے حوالے سے ایک عظیم الشان سرکاری تقریب میں شریک ہوں گے۔ اس موقع پر بھی وزیراعظم کی جانب سے خصوصی خطاب متوقع ہے، یہ خطاب بھی براہ راست نشر کیا جائے گا۔

آذربائیجان کے یومِ آزادی کی تقریب سے وزیراعظم کا خطاب پاکستان کے معیاری وقت کے مطابق سہ پہر 4 بجے سے شام 6 بجے کے درمیان نشر کیا جائے گا۔

وزیراعظم کا یہ دورہ تینوں ممالک کے درمیان تزویراتی تعاون کو وسعت دینے اور مشترکہ ترقی کے اہداف پر پیش رفت کا مظہر ہے۔