اسلام آباد: وزیر اعظم شہباز شریف اور چیف آف آرمی اسٹاف فیلڈ مارشل سید عاصم منیر سے لیبیا کی مسلح افواج کے کمانڈر ان چیف لیفٹیننٹ جنرل صدام خلیفہ ہفتار نے ملاقات کی ہے۔

وزیراعظم محمد شہباز شریف سے لیبیا کی مسلح افواج کے کمانڈر ان چیف لیفٹیننٹ جنرل صدام خلیفہ ابو قاسم ہفتار نے آج وفد کے ہمراہ وزیراعظم ہاؤس اسلام آباد میں اہم ملاقات کی۔

ملاقات میں پاکستان اور لیبیا کے درمیان دفاع، سفارت کاری اور باہمی تعاون کے مختلف شعبوں میں تعلقات کو مزید فروغ دینے پر تبادلہ خیال کیا گیا۔ وزیراعظم شہباز شریف نے لیبیا کے اعلیٰ عسکری وفد کو پاکستان آمد پر خوش آمدید کہا اور باہمی تعلقات کے استحکام پر زور دیا۔

لیبیا کے کمانڈر ان چیف کا اظہار تشکر

لیفٹیننٹ جنرل صدام خلیفہ ہفتار نے وزیراعظم شہباز شریف اور پاکستانی حکومت کا پرتپاک استقبال اور میزبانی پر شکریہ ادا کیا اور دونوں ممالک کے درمیان دفاعی روابط کو مزید مضبوط بنانے کی خواہش کا اظہار کیا۔

اس اہم ملاقات میں نائب وزیراعظم و وزیر خارجہ اسحاق ڈار، وفاقی وزیر دفاع خواجہ آصف، وفاقی وزیر دفاعی پیداوار رضا حیات ہراج، وزیراعظم کے مشیر ڈاکٹر توقیر شاہ، معاون خصوصی طارق فاطمی اور دیگر اعلیٰ سرکاری افسران نے بھی شرکت کی۔

فیلڈ مارشل سے ملاقات

خیال رہے کہ اس سے قبل لیبیا کی مسلح افواج کے کمانڈر ان چیف نے چیف آف آرمی اسٹاف فیلڈ مارشل سید عاصم منیر سے جنرل ہیڈ کوارٹرز (جی ایچ کیو) میں ملاقات کی تھی۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف فیلڈ مارشل اور لیبیا کی مسلح افواج کے کمانڈر ان چیف کے درمیان باہمی دلچسپی کے امور، علاقائی سلامتی کی صورتحال، درپیش سیکیورٹی چیلنجز اور دفاعی تعاون پر تفصیلی تبادلہ خیال ہوا۔

آئی ایس پی آر نے بتایا تھا کہ ملاقات کے دوران دونوں ممالک کی عسکری قیادت نے دفاعی صنعتی تعاون کو فروغ دینے اور تکنیکی مہارت کے تبادلے پر اتفاق کیا۔

یادگار شہدا پر حاضری

ترجمان پاک فوج کا کہنا تھا کہ جی ایچ کیو آمد پر لیفٹیننٹ جنرل صدام خلیفہ ہفتار نے یادگار شہدا پر حاضری دی اور پاکستان کی مسلح افواج کے شہداء کو خراج عقیدت پیش کیا۔

پاک فوج کے شعبہ تعلقات عامہ نے مزید بتایا تھا کہ اس موقع پر پاک فوج کے چاق و چوبند دستے نے لیبیا کے معزز مہمان کو گارڈ آف آنر بھی پیش کیا۔