تھائی لینڈ کے دارالحکومت بنکاک میں منعقدہ مس یونیورس 2025 کے مقابلے میں میکسیکو کی فاطمہ بوش نے حسینہ عالم کا تاج اپنے نام کر لیا۔

فاطمہ بوش کو گزشتہ سال کی فاتح ڈنمارک کی وکٹوریا کیئر تھیلوگ نے مس یونیورس کا تاج پہنایا۔

میزبان ملک تھائی لینڈ کی نمائندگی کرنے والی وینا پروینر سنگھ کو فرسٹ رنر اپ قرار دیا گیا جبکہ ٹاپ 5 میں وینزویلا کی اسٹیفنی اباسالی، فلپائن کی آتھیسا مانیلو اور آئیوری کوسٹ کی اولیویا یاسے شامل رہیں۔

میڈیا رپورٹس کے مطابق اس سال کا مقابلہ حسن ابتدا سے ہی توجہ کا مرکز رہا، فائنل سے قبل میکسیکو کی فاطمہ بوش لائیو اسٹریمڈ میٹنگ کے دوران تھائی ایونٹ ڈائریکٹر کی سرِعام سرزنش کا نشانہ بنیں، جس کے بعد متعدد فائنلسٹ حسیناؤں نے احتجاجاً واک آؤٹ کیا، تاہم اس واقعے کے بعد فاطمہ بوش مداحوں کی پسندیدہ امیدوار کے طور پر ابھریں۔

رپورٹس میں بتایا گیا کہ فائنل سے قبل مس یونیورس کے دو ججز نے بھی استعفیٰ دے دیا تھا۔ اس سال کے مقابلے میں 120 ممالک کی نمائندہ خواتین نے حصہ لیا، جن میں فلسطین سے ندین ایوب اور متحدہ عرب امارات سے مریم محمد پہلی بار میدان میں اتریں جبکہ پاکستان کی نمائندگی روما ریاض نے کی۔

واضح رہے کہ فاطمہ بوش انسانیت دوست سرگرمیوں اور رضاکارانہ کاموں کے لیے بھی جانی جاتی ہیں، جس کی وجہ سے وہ مداحوں میں مقبولیت حاصل کر چکی ہیں۔

مزید پڑھیں: مس یونیورس 2025 میں امارات کی انٹری؛ مریم محمد سب کی توجہ کا مرکز بن گئیں