پشاور: صدر کوہاٹ روڈ پر واقع فیڈرل کانسٹبلری (ایف سی) ہیڈکوارٹرز پر آج صبح تقریباً 8 بجے دہشت گردوں نے حملے کی کوشش کی، جسے سیکیورٹی فورسز نے ناکام بنا دیا۔
سیکیورٹی ذرائع کے مطابق حملہ آوروں نے ایف سی ہیڈکوارٹر پر 2 خودکش دھماکے کیے، ایک دھماکا مرکزی دروازے پر جبکہ دوسرا دھماکا موٹرسائیکل اسٹینڈ پر ہوا۔
خودکش دھماکے کے فوراً بعد 2 مزید حملہ آور عمارت میں گھسنے کی کوشش کر رہے تھے جنہیں سیکیورٹی اہلکاروں نے جوابی کارروائی میں مار دیا۔
سیکیورٹی ذرائع نے اس بات کی تصدیق کی ہے کہ تینوں حملہ آور ہلاک ہو چکے ہیں جبکہ علاقے میں فائرنگ کا سلسلہ رک گیا ہے۔
ذرائع کے مطابق حملے میں فیڈرل کانسٹبلری کے 3 اہلکار شہید اور 4 زخمی ہوئے ہیں۔ شہید اہلکاروں میں حوالدار عالمزیب، سپاہی ریاست اور سپاہی الطاف شامل ہیں جبکہ لانس نائیک زیک، سپاہی ارشد، سپاہی عطاء اللہ اور سپاہی عرفان زخمی ہوئے ہیں۔
دھماکے کی شدت سے قریبی عمارتوں کے شیشے ٹوٹ گئے جبکہ صدر روڈ اور اطراف کے علاقوں کو ٹریفک کے لیے بند کر دیا گیا۔
مزید پڑھیں: فتنۃ الخوارج کا خودکش حملہ ناکام؛ 4 خوارجی جہنم واصل
سیکیورٹی فورسز نے گستاخانہ حملے کے بعد علاقے کو مکمل طور پر گھیرے میں لے لیا ہے اور سرچ آپریشن جاری ہے۔ حساس مقام ہونے کے باعث داخلی و خارجی راستوں کی نگرانی مزید سخت کر دی گئی ہے جبکہ علاقے کی کلیئرنس تیزی سے مکمل کی جا رہی ہے۔
ریسکیو ٹیمیں فوری طور پر جائے وقوعہ پہنچ گئیں اور زخمی اہلکاروں کو اسپتال منتقل کر دیا گیا۔ ڈی سی پشاور کے مطابق شہر کے تمام اسپتالوں کو ہائی الرٹ کر دیا گیا ہے۔
آئی جی خیبرپختونخوا نے بتایا کہ ابتدائی تحقیقات کے مطابق ایک دھماکا مرکزی دروازے پر جبکہ دوسرا موٹرسائیکل اسٹینڈ کے قریب ہوا۔ 2 حملہ آور فائرنگ کے تبادلے میں مارے جا چکے ہیں جبکہ صورتحال مکمل طور پر سیکیورٹی فورسز کے کنٹرول میں ہے۔
ابتدائی رپورٹ تیار
پشاور کے ایف سی ہیڈ کوارٹر میں دھماکے کی ابتدائی رپورٹ تیار کر لی گئی ہے، جس کے مطابق دھماکے کے وقت ایف سی ہیڈ کوارٹر میں پریڈ جاری تھی، جس میں 450 اہلکار موجود تھے۔
ابتدائی رپورٹ میں بتایا گیا کہ ایف ہیڈ کواٹر کی جانب 3 خود کش حملہ پیدل پیدل آئے، تمام دہشت گردوں نے خود کش بمبار جیکٹس پہنی ہوئی تھی، دہشت گردی منصوبہ بندی کے تحت آئے تھے جن کا ٹارگٹ پریڈ تھی، تاہم واقعے کی تحقیقات جاری ہے اور شوائد اکٹھے کیے جا رہے ہیں۔
دہشتگردوں کی شناخت
سیکیورٹی ذرائع نے بتایا ہے کہ ایف سی ہیڈ کوارٹر پر حملہ کرنے والے دہشتگردوں کی شناخت ہو گئی ہے، ہلاک ہونے والے تینوں دہشتگرد افغانی تھے، جہنم واصل کیے جانے والے دہشتگردوں سے ہتھیار و گولہ بارود برآمد کرلیا گیا ہے۔
