23ویں فارما ایشیا انٹرنیشنل ایگزیبیشن اینڈ کانفرنسز 2025 کا دوسرا دن کراچی ایکسپو سینٹر میں کامیابی سے تکمیل کو پہنچا۔
نمائش کے دوسرے دن 13500 سے زائد فارما پروفیشنلز نے شرکت کی جبکہ سرحد چیمبر آف کامرس اینڈ انڈسٹری کے صدر جنید الطاف نے نمائش ہالز کا دورہ کیا اور صنعتی ترقی کو سراہتے ہوئے کہا کہ فارما سیکٹر کی پیش رفت پاکستان کے مستقبل کی مضبوطی کا باعث ہے۔
فارما ایشیا نمائش میں ڈرگ ریگولیٹری اتھارٹی آف پاکستان (ڈریپ) ایک اہم اجلاس منعقد کررہی ہے، جس کا مقصد ملک میں ادویات کی ٹریس ایبلٹی نظام کے نفاذ پر بریفنگ اور پیش رفت کا جائزہ لینا ہے۔
ڈریپ کی ریگولیٹری اپ ڈیٹس فارما صنعت میں شفافیت اور میعاری نظام کا باعث بنیں گی، ایس آئی ایف سی اور پاکستان فارماسیوٹیکل مینوفیکچررز ایسوسی ایشن کا اشتراک سرمایہ کاری اور صنعتی استحکام کی بنیاد ثابت ہوگا۔
مزید پڑھیں: 23ویں فارما ایشیا 2025 کا کراچی ایکسپو سینٹر میں شاندار آغاز
فارما ایشیا نمائش پاکستانی فارما انڈسٹری کی عالمی سطح پر شناخت اور ترقی کے لیے ایک اہم قدم قرار دیا گیا ہے، تاہم ایکسپو سے ادویات کی مقامی پیداوار میں بہتری، ملک میں سستی اور معیاری دواؤں کی دستیابی میں خاطر خواہ اضافہ ہوگا۔
عالمی کمپنیوں اور سرمایہ کاروں کے اعتماد سے صنعتی ترقی اور معاشی استحکام میں اضافہ ہوگا، یہ پلیٹ فارم کاروباری روابط، برآمدات اور سرمایہ کاری کے نئے مواقع فراہم کرنے میں مددگار ثابت ہوگا۔
