اسلام آباد: صدرِ پاکستان آصف علی زرداری نے کہا ہے کہ قطر کے ساتھ سرمایہ کاری اور تجارت میں تعاون بڑھانے کے خواہاں ہیں۔
صدر مملکت آصف علی زرداری کی جانب سے ریاستِ قطر کے قومی دن پر مبارکباد پیش کی گئی اور امیرِ قطر شیخ تمیم بن حمد الثانی اور قطری عوام کے لیے نیک تمناؤں کا اظہار بھی کیا گیا۔
انہوں نے کہا کہ پاکستان اور قطر کے تعلقات مشترکہ اقدار اور باہمی احترام پر مبنی ہیں، دونوں ممالک کے درمیان قریبی اور دیرپا برادرانہ تعلقات قائم ہیں۔
اپنے پیغام میں صدر کا کہنا تھا کہ امیرِ قطر کی قیادت میں قطر نے نمایاں ترقی اور کامیابیاں حاصل کیں، خطے اور عالمی سطح پر قطر کا مثبت کردار قابلِ تحسین ہے۔
آصف علی زرداری نے کہا کہ پاکستان قطر کے ساتھ سرمایہ کاری اور تجارت میں تعاون بڑھانے کا خواہاں ہے، توانائی، زراعت اور ٹیکنالوجی میں شراکت داری کو فروغ دیا جائے گا۔
انہوں نے پاکستان اور قطر کی دوستی مزید مضبوط بنانے کے عزم کا اظہار کرتے ہوئے کہا کہ افرادی قوت اور عوامی روابط دونوں ممالک کے تعلقات کی بنیاد ہیں۔
