اسلام آباد: ملک میں ہفتہ وار بنیادوں پر مہنگائی کی شرح میں ایک بار پھر اضافہ ریکارڈ کیا گیا ہے۔

ادارہ شماریات کی جانب سے جاری ہفتہ وار رپورٹ کے مطابق مہنگائی کی شرح میں 0  اعشاریہ 24 فیصد اضافہ ہوا ہے جب کہ ہفتہ وار مہنگائی کی سالانہ شرح بڑھ کر 3 اعشاریہ 75 فیصد کی سطح پر آگئی ہے۔

رپورٹ میں بتایا گیا ہے کہ گزشتہ ایک ہفتے کے دوران مجموعی طور پر 17 اشیائے ضروریہ مہنگی ہوئیں جب کہ 14 اشیاء کی قیمتوں میں کمی ریکارڈ کی گئی۔ اس دوران 20 اشیاء کی قیمتیں مستحکم رہیں۔

گزشتہ ہفتے کے دوران چکن فی کلو 40 روپے 34 پیسے مہنگا ہوگیا جب کہ انڈے فی درجن 10 روپے 31 پیسے اضافے کے بعد مزید مہنگے ہوگئے۔ اسی طرح جلانے کی لکڑی فی من 12 روپے 35 پیسے مہنگی ہوئی۔

دالوں کی قیمتوں میں بھی اضافہ ریکارڈ کیا گیا، جہاں دال مونگ ایک روپے 17 پیسے مہنگی ہوئی۔ دہی، تازہ دودھ، مٹن اور بچوں کا خشک دودھ بھی مہنگی ہونے والی اشیاء میں شامل ہیں جس سے عام صارفین پر مہنگائی کا دباؤ مزید بڑھ گیا ہے۔

دوسری جانب بعض اشیاء کی قیمتوں میں کمی بھی دیکھی گئی۔ ایک ہفتے کے دوران ٹماٹر فی کلو 9 روپے ایک پیسہ اور آلو فی کلو 5 روپے 8 پیسے سستے ہوئے۔

اسی طرح چینی کی فی کلو قیمت میں 7 روپے 9 پیسے اور گڑ کی فی کلو قیمت میں 2 روپے 49 پیسے کمی ریکارڈ کی گئی۔

ایندھن کی قیمتوں میں بھی کمی دیکھنے میں آئی، جہاں ڈیزل فی لیٹر 14 روپے تک سستا ہوا۔ اس کے علاوہ دال مسور، کیلے اور ایل پی جی کا گھریلو سلنڈر بھی سستی ہونے والی اشیاء میں شامل ہیں۔

ادارہ شماریات نے مزید بتایا کہ بریڈ، گندم کا آٹا، کپڑے اور بجلی سمیت 20 اشیاء کی قیمتیں گزشتہ ہفتے مستحکم رہیں۔