ایڈیلیڈ: آسٹریلیا نے تیسرے ٹیسٹ میں 82 رنز سے فتح حاصل کرتے ہوئے انگلینڈ کو شکست دی اور صرف 11 دن میں ایشز سیریز 3-0 سے اپنے نام کر لی۔

آخری دن انگلینڈ کے نچلے نمبر کے بلے بازوں نے جرات مندانہ مزاحمت کرتے ہوئے مقابلہ دوپہر کے سیشن تک کھینچ لیا، مگر آسٹریلوی باؤلرز اور فیلڈرز نے اعصاب قابو میں رکھتے ہوئے فتح سمیٹ لی۔

فیصلہ کن لمحہ اسکاٹ بولینڈ کے ہاتھ آیا، جنہوں نے جوش ٹنگ کی اننگ کا خاتمہ کیا، اور مارنس لبوشین نے پہلی سلپ میں شاندار کیچ تھام کر میچ ختم کر دیا۔

اس کے ساتھ ہی آسٹریلیا نے سیریز میں تیسری لگاتار کامیابی حاصل کرتے ہوئے سیریز میں فیصلہ کن کامیابی حاصل کرلی۔

لبوشین کا میدان میں کردار میچ کے نمایاں پہلوؤں میں شامل رہا، جہاں انہوں نے ایک ہاتھ سے دو شاندار کیچز سمیت مجموعی طور پر چار کیچ پکڑے۔

انگلینڈ کے لیے جیمی اسمتھ 60 اور ول جیکس نے 47 رنز کی اننگز کھیل کر جیت کی امید جگائی، جبکہ برائیڈن کارس 39 رنز پر ناٹ آؤٹ رہے، مگر یہ مزاحمت ناکافی ثابت ہوئی۔

میچ کے دوران ایک اہم موڑ اس وقت آیا جب نیتھن لیون فیلڈنگ کے دوران دائیں ہیم اسٹرنگ میں انجری کا شکار ہو کر میدان سے باہر چلے گئے، جس سے ان کی سیریز میں مزید شرکت مشکوک ہو گئی۔

اس دباؤ کے عالم میں مچل اسٹارک نے ذمہ داری سنبھالی اور آخری چار میں سے ابتدائی تین وکٹیں حاصل کر کے انگلینڈ کی واپسی کی امیدیں ختم کر دیں۔

اگرچہ اس میچ میں اسٹارک پلیئر آف دی میچ نہ بن سکے، مگر کامپٹن-ملر میڈل کے مضبوط امیدوار کے طور پر ان کی برتری واضح ہو گئی ہے۔

آسٹریلیا کی اننگز میں ٹریوس ہیڈ 170 اور ایلکس کیری نے 72 رنز بنا کر مضبوط بنیاد فراہم کی، جبکہ انگلینڈ کی جانب سے جوش ٹنگ نے 4 وکٹیں حاصل کیں۔ جواب میں انگلینڈ دونوں اننگز میں 286 اور 352 رنز تک محدود رہا۔

یوں آسٹریلیا نے ایک بار پھر اپنی مضبوط فیلڈنگ، بروقت وکٹوں اور اعصابی مضبوطی کے بل پر ایشز پر اپنی گرفت برقرار رکھی۔