ناسا کے چار خلا باز جو آئندہ سال کے اوائل میں چاند کے گرد مشن کے لیے تیار ہو رہے ہیں، نے اس ہفتے کے اختتام پر ایک مکمل ڈریس ریہرسل کاؤنٹ ڈاؤن میں حصہ لیا۔

اس دوران انہوں نے ناسا کے اورین اسپیس کرافٹ میں نشستیں سنبھالیں، جو پانچ دہائیوں بعد چاند کے گرد انسانی پرواز کی تیاری کے لیے ایک اہم قدم ہے۔

یہ پیچیدہ ٹیسٹ اصل میں نومبر کے آخر میں شیڈول تھا، تاہم ہفتے کے روز کاؤنٹ ڈاؤن کے دوران متعدد توقف اور دوبارہ شروع ہونے کے مراحل دیکھنے میں آئے۔

 ناسا نے پیش آنے والے مسائل کی تفصیلات نہیں بتائیں، مگر آرٹیمس 2 کے کمانڈر ریڈ ویزمین نے کہا کہ ریہرسل مجموعی طور پر کامیاب رہی۔

آرٹیمس 2  مشن 1972 کے اپالو 17 کے بعد چاند کے لیے پہلا انسانی مشن ہوگا، جس میں ویزمین اور ان کے ساتھی خلا باز زمین سے اب تک کسی انسان سے زیادہ فاصلے پر جائیں گے۔

یہ پرواز آرٹیمس 3  کی راہ ہموار کرے گی، جس میں ناسا کی امید ہے کہ 2028 میں خلا باز چاند کے جنوبی قطب کے قریب اترنے میں کامیاب ہوں گے۔

ویزمین نے امریکی سوشل میڈیا پلیٹ فارم ایکس پر ٹیسٹ کے بارے میں کہا کہ یہ ہمارے اسپیس کرافٹ کی سالمیت کے لیے ایک انتہائی کامیاب دن تھا۔

کیا سب کچھ مکمل طور پر درست ہوا؟ بالکل نہیں، مگر ہماری ٹیم نے ثابت کیا کہ ہم چیلنج کے لیے تیار ہیں اور لانچ بہت قریب ہے۔

امریکی میڈیا کے مطابق آرٹیمس 2  مشن کا ابتدائی شیڈول فروری کے اوائل کے لیے ہے، تاہم سخت ٹائم لائن کے باعث لانچ مارچ کے اوائل تک بھی مؤخر ہو سکتی ہے۔ حتمی فیصلہ نئے سال کے آغاز کے بعد متوقع ہے ۔

ٹیسٹ کے دوران ویزمین، وکٹر گلوور، کرسٹینا کوچ اور کینیڈین خلا باز جیمنی ہینسن نے نارنجی پریشر سوٹ پہن کر اور لانچ کے دن کے پروسیجرز کے مطابق اورین میں نشستیں سنبھالیں۔

یہ کارروائی کینیڈی اسپیس سینٹر میں ویہیکل اسمبلی بلڈنگ کے اندر ناسا کے ایس ایل ایس راکٹ پر انجام دی گئی۔

لانچ کے بعد اورین اور اس کا عملہ تقریباً 25 گھنٹے ایک بیضوی زمین کی مدار میں گزارے گا تاکہ لائف سپورٹ، پروپلسن اور نیوی گیشن سسٹمز کا جائزہ لیا جا سکے۔

نومبر 2022 میں ہونے والی غیر انسانی پرواز آرٹیمس 1  کے برعکس، جس میں مکمل لائف سپورٹ سسٹم موجود نہیں تھا، آرٹیمس 2  مشن چاند کے گرد ایک “فری ریٹرن” راستے پر جائے گا اور پھر بغیر چاند کے مدار میں داخل ہوئے پیسفک میں واپسی کرے گا۔