مائیکروسافٹ نے اسکائپ کے لاکھوں صارفین کو خبردار کیا ہے کہ وہ اپنا اہم ڈیٹا جلد محفوظ کرلیں، ورنہ یہ معلومات ہمیشہ کے لیے ضائع ہو سکتی ہیں۔ کمپنی نے اسکائپ کی بندش کے بعد صارفین کو اپنے پیغامات، رابطہ نمبرز اور دیگر اہم ڈیٹا کو ایکسپورٹ کرنے کی ہدایت کر دی ہے۔

مائیکروسافٹ نے رواں سال اسکائپ کو مکمل طور پر بند کر دیا تھا تاکہ وہ اپنی توجہ مائیکروسافٹ ٹیمز پر مرکوز کر سکے۔ اسکائپ ایک وقت میں دنیا بھر میں 30 کروڑ ماہانہ صارفین کے ساتھ مقبول تھا، لیکن واٹس ایپ، زوم اور مائیکروسافٹ ٹیمز جیسے نئے پلیٹ فارمز کی آمد کے بعد اس کی مقبولیت میں واضح کمی آئی۔ اسکائپ کا آغاز 2003 میں ہوا اور 2011 میں مائیکروسافٹ نے اسے خرید لیا۔

یہ بھی پڑھیں: اسکائپ آج سے دنیا بھرمیں بند، کیا ٹیمز نعم البدل ثابت ہوسکے گا؟

مائیکروسافٹ نے 5 مئی 2023 کو اسکائپ کو باضابطہ طور پر ختم کر دیا، لیکن صارفین کو اپنے ڈیٹا کو محفوظ کرنے کے لیے 2026 تک کا وقت دیا ہے۔

جنوری 2026 تک، اسکائپ کے صارفین کو اپنا ڈیٹا ایکسپورٹ کرنے یا خود حذف کرنے کا موقع ملے گا۔ مائیکروسافٹ نے کہا ہے کہ جو صارفین اس مدت میں مائیکروسافٹ ٹیمز فری میں لاگ ان ہوں گے، انہیں اسکائپ کی کالز اور چیٹ ہسٹری تک رسائی ملتی رہے گی۔

اگر جنوری 2026 تک صارفین نے کوئی اقدام نہ اٹھایا تو اسکائپ کا تمام ڈیٹا خودکار طور پر مستقل طور پر حذف کر دیا جائے گا، اور اس کے بعد یہ ڈیٹا کبھی بھی واپس نہیں لایا جا سکے گا۔

مائیکروسافٹ کی ہدایت

مائیکروسافٹ نے صارفین سے درخواست کی ہے کہ وہ اپنے اسکائپ اکاؤنٹس کو فوراً چیک کریں تاکہ اہم یادیں اور معلومات ضائع ہونے سے بچ سکیں۔ اس وقت کی اہمیت کو مدنظر رکھتے ہوئے، مائیکروسافٹ نے صارفین کو فوری کارروائی کرنے کی ہدایت دی ہے۔

یہ اعلان اسکائپ کے صارفین کے لیے ایک اہم یاد دہانی ہے کہ وہ اپنے ڈیٹا کو محفوظ کریں، تاکہ بعد میں پچھتانے کی ضرورت نہ پڑے۔