حج 2026 کے لیے خدام الحجاج کے انتخاب کا مرحلہ مکمل کر لیا گیا ہے۔ ذرائع وزارت مذہبی امور کے مطابق پاسپورٹ اور دیگر ضروری کوائف سعودی عرب کی مسار ایپ پر اپ لوڈ کر دیے گئے ہیں۔

منتخب امیدواروں کا انتخاب این ٹی ایس کے تحریری امتحان کے ذریعے کیا گیا، جبکہ اشتہار کے ذریعے امیدواروں سے درخواستیں طلب کی گئی تھیں۔

کمپنی کے انتخاب کا عمل شفاف اور پیپرا قواعد کے مطابق کھلی بولی (اوپن بڈنگ) کے تحت مکمل کیا گیا۔ این ٹی ایس کے ذریعے 780 فیلڈ اسٹاف اور 100 سپروائزری اسٹاف کو میرٹ کی بنیاد پر چنا گیا۔

ذرائع کے مطابق خدام الحجاج کے انتخاب میں میرٹ کا خصوصی خیال رکھا گیا اور امیدواروں کے انٹری ٹیسٹ کے نتائج کی بنیاد پر شارٹ لسٹنگ کی گئی۔

ٹیسٹ میں کامیاب امیدواروں کی دستاویزات کی جانچ پڑتال بھی کی گئی۔ منتخب کیے گئے امیدواروں میں 70 فیصد پرانے (ریپیٹرز) اور 30 فیصد نئے امیدوار شامل ہیں، جبکہ خواتین بھی اس عمل میں شامل ہیں۔

سپروائزر کیٹیگری میں بھی نئے اور پرانے دونوں امیدوار شامل ہیں اور ہر 100 حاجیوں کے لیے ایک سپورٹنگ اسٹاف مقرر کیا جائے گا۔

انتخابی عمل میں کسی قسم کی بے ضابطگی نہیں ہوئی اور خدام الحجاج میں گریڈ 11 سے 18 تک کے سرکاری ملازمین شامل ہیں۔

ذرائع نے بتایا کہ خدام الحجاج کے انتخاب میں صوبائی کوٹہ مکمل طور پر نافذ کیا گیا۔ انتخاب دو کیٹگریز کے تحت ہوا، جہاں سپروائزر کیٹیگری کے لیے 100 اور معاون عملے کے لیے 780 نشستیں مختص کی گئی تھیں۔ سپروائزر اور معاون عملے کی کیٹگریز کے میرٹ مختلف رہے۔

صوبائی کوٹہ کے مطابق: اسلام آباد 1 فیصد، پنجاب 49 فیصد، سندھ (شہری) 7.60 فیصد، سندھ (دیہی) 11.40 فیصد، خیبر پختونخوا 11.50 فیصد، بلوچستان 6 فیصد، سابق فاٹا 3 فیصد، آزاد جموں و کشمیر 2 فیصد اور گلگت بلتستان 1 فیصد رکھا گیا۔