وزیراعظم شہباز شریف نے کہا کہ حضرت عیسیٰ علیہ السلام کی تعلیمات پوری انسانیت کےلیے محبت، امن، رواداری کا پیغام ہیں۔
وزیراعظم شہباز شریف نے کہا کہ آج کرسمس کے پرمسرت اور بابرکت موقع میں عوام اور حکومت پاکستان کی جانب سے دنیا بھر اور بالخصوص پاکستان میں بسنے والی مسیحی برادری کو دلی مبارکباد پیش کرتا ہوں، تمام اہل وطن کو اس تہوار کی روایتی خوشیاں مبارک ہوں۔
انہوں نے کہا کہ حضرت عیسی علیہ السلام کی ولادت باسعادت کے اس مبارک دن ہم دعاگو ہیں کہ یہ کرسمس مسیحی برادری اور ہمارے ملک کے لیے باعث امن و استحکام اور خوشحالی کی نوید لے کر آئے۔
شہباز شریف کا کہنا تھا کہ کرسمس نہ صرف مسیحی برادری کا جشن و تقریبات پر مشتمل مذہبی تہوار ہے بلکہ یہ پوری انسانیت کے لیۓ پیغام محبت ، امن و رواداری اور خیر سگالی کے جذبات سے ہمیں ایک دوسرے سے جوڑتا ہے۔
یہ بھی پڑھیں: قائداعظمؒ کا یومِ پیدائش اور کرسمس؛ مسلح افواج کا قومی یکجہتی کا اظہار
انہوں نے کہا کہ حضرت عیسی علیہ السلام، اللہ تعالی کے ایک جلیل القدر پیغمبر کی حیثیت سے اسلام میں نہایت محترم مقام رکھتے ہیں۔ انہوں نے پوری انسانیت کے لیے امن، بھائی چارے اور محبت کا پیغام دیا اور لوگوں کو نیکی، تقوی اور پاکیزہ طرز زندگی کی تلقین کی۔
وزیراعظم کا یہ بھی کہنا تھا کہ ہمارے مسیحی بھائی پاکستان میں بڑی فعال، مثبت اور پر امن برادری کی حیثیت سے قابل قدر کردار ادا کر رہے ہیں۔ ملک کی مجموعی سماجی و معاشی ترقی کے لئے انکی مخلصانہ کاوشیں تحسین کے لائق ہیں۔
ان کا یہ بھی کہنا تھا کہ پاکستان میں دہشت گردی کے خلاف جدوجہد میں پوری قوم کے شانہ بشانہ انکی قربانیاں ہمارے لئے باعث فخر ہیں، مسیحی برادری کی تعلیم، طب اور دیگر شعبہ ہائے زندگی میں بھی گراں قدر خدمات سماجی ہم آہنگی کے فروغ کا باعث ہیں، تمام شہریوں کے لیے بلا تفریق رنگ و نسل باہمی ہم آہنگی، حقوق و آزادی کا تحفظ، معاشی آسودگی، پیشہ ورانہ ترقی کے یکساں مواقع حکومت پاکستان کی ترجیحات میں شامل ہے۔
شہباز شریف نے مزید کہا کہ آئیے آج کے اس خوشیوں بھرے دن پر تجدید عہد کریں کہ سب طبقات اور مذاہب کے مکاتب فکر مل کر قوم کی اپنی آنے والی نسلوں کے لیے ایک مضبوط، محفوظ اور خوشحال پاکستان کے لیے تعمیری کرادر ادا کرتے رہیں گے، آپ سب کو نیک تمنائوں کے ساتھ کرسمس کی دلی مبارکباد!
