24 دسمبر 2025 کو سکیورٹی فورسز نے ضلع ڈیرہ اسماعیل خان کے علاقے کلاچی میں خوارج کی موجودگی کی اطلاع پر انٹیلی جنس بیسڈ آپریشن کیا۔ کارروائی کے دوران فورسز نے خوارج کے ٹھکانے کو مؤثر انداز میں نشانہ بنایا۔
پاک فوج کے شعبہ تعلقات عامہ (آئی ایس پی آر) کے مطابق آپریشن کے نتیجے میں دو خوارج مارے گئے، جن میں خارجی گروہ کا سرغنہ دلاور بھی شامل تھا۔ ہلاک ہونے والا خارجی دلاور قانون نافذ کرنے والے اداروں کو متعدد دہشت گرد کارروائیوں میں مطلوب تھا اور حکومت کی جانب سے اس کے سر کی قیمت 40 لاکھ روپے مقرر کی گئی تھی۔
مزید پڑھیں: سیکیورٹی فورسز کا ڈیرہ بگٹی میں آپریشن؛ 5 بھارتی اسپانسرڈ دہشت گرد ہلاک
سکیورٹی ذرائع کے مطابق ہلاک خوارج کے قبضے سے اسلحہ اور گولہ بارود بھی برآمد کیا گیا۔ یہ عناصر سکیورٹی فورسز کے خلاف دہشت گرد سرگرمیوں کے ساتھ ساتھ معصوم شہریوں کے قتل میں بھی ملوث رہے۔
علاقے میں مزید کسی بھارتی سرپرستی میں سرگرم خارجی کی موجودگی کے خدشے کے پیش نظر کلیئرنس اور سرچ آپریشن جاری ہے۔
سکیورٹی فورسز اور قانون نافذ کرنے والے ادارے وفاقی ایپکس کمیٹی کی منظوری سے قومی ایکشن پلان کے تحت شروع کیے گئے وژن “عزمِ استحکام” کے مطابق ملک سے غیر ملکی سرپرستی میں ہونے والی دہشت گردی کے مکمل خاتمے تک اپنی بھرپور انسدادِ دہشت گردی مہم جاری رکھیں گے۔
