حکومتِ پاکستان اور ایشیائی ترقیاتی بینک (اے ڈی بی) کے درمیان مجموعی طور پر 730 ملین ڈالر مالیت کے دو اہم ترقیاتی منصوبوں کے معاہدوں پر دستخط کر دیے گئے۔ یہ بات وزارتِ اقتصادی امور کے ترجمان نے ایک اعلامیے میں بتائی۔
اعلامیے کے مطابق 330 ملین ڈالر کے سیکنڈ پاور ٹرانسمیشن منصوبے کے معاہدے پر دستخط کیے گئے ہیں، جس کے تحت آئندہ آنے والے پن بجلی کے منصوبوں سے تقریباً 2,300 میگاواٹ بجلی کی قابلِ اعتماد ترسیل ممکن ہو سکے گی۔
سیکرٹری اقتصادی امور کے مطابق یہ منصوبہ قومی بجلی کے ترسیلی نظام کو مضبوط بنانے میں اہم کردار ادا کرے گا۔
اس کے علاوہ 400 ملین ڈالر مالیت کے سرکاری ملکیتی اداروں (SOEs) کے ٹرانسفارمیشن پروگرام پر بھی دستخط کیے گئے ہیں۔
سیکرٹری اقتصادی امور نے بتایا کہ اس پروگرام کے ذریعے ایس او ای ایکٹ اور متعلقہ پالیسی پر مؤثر عملدرآمد کو یقینی بنایا جائے گا، جس سے سرکاری اداروں کی کارکردگی اور شفافیت میں بہتری آئے گی۔
ایشیائی ترقیاتی بینک کی کنٹری ڈائریکٹر ایما فان نے ان اقدامات کے لیے حکومتِ پاکستان کے مضبوط عزم کو سراہتے ہوئے کہا کہ سرکاری ملکیتی اداروں میں اصلاحات کا یہ پروگرام حکومت کی مجموعی اصلاحاتی کوششوں کو مزید تقویت دے گا۔
وزارتِ اقتصادی امور کے مطابق یہ معاہدے پاکستان میں توانائی کے شعبے کی بہتری اور ادارہ جاتی اصلاحات کے فروغ کی جانب ایک اہم پیش رفت ہیں۔
