لاہور: پاکستان کرکٹ بورڈ (پی سی بی) نے پاکستان سپر لیگ (پی ایس ایل) کی دو نئی فرنچائزز کی فروخت کے لیے دی گئی بولیوں کا تکنیکی جائزہ مکمل کرلیا ہے۔

پی ایس ایل میں دو نئی ٹیموں کے لیے دنیا بھر سے مجموعی طور پر 12 بولیاں موصول ہوئیں جن میں سے بولی کمیٹی نے تفصیلی جانچ پڑتال کے بعد 10 پارٹیوں کو تکنیکی معیار پر پورا اترنے پر اہل قرار دے دیا ہے۔

تکنیکی ایویلیوایشن میں کامیاب ہونے والی یہ 10 پارٹیاں اب نیلامی کے اگلے مرحلے میں حصہ لینے کی اہل ہوں گی۔ دو نئی پی ایس ایل ٹیموں کی نیلامی 8 جنوری 2026 کو جناح کنونشن سینٹر اسلام آباد میں منعقد کی جائے گی۔

یہ بھی پڑھیں: پی ایس ایل 11 کے لیے غیر ملکی کھلاڑیوں کی رجسٹریشن کا آغاز

پی سی بی کے مطابق نیلامی میں کامیاب ہونے والی پارٹیاں اپنی ٹیموں کے لیے راولپنڈی، حیدر آباد، فیصل آباد، گلگت، مظفرآباد اور سیالکوٹ میں سے کسی ایک شہر کا انتخاب کرسکیں گی۔

پی ایس ایل کے چیف ایگزیکٹو آفیسر سلمان نصیر نے تکنیکی مرحلے میں کامیاب ہونے والے تمام بولی دہندگان کو مبارکباد دیتے ہوئے کہا کہ مقامی اور غیر ملکی سرمایہ کاروں کی بھرپور دلچسپی خوش آئند ہے۔

سلمان نصیر کا کہنا تھا کہ پی ایس ایل کی توسیع لیگ کی ترقی کی جانب ایک اہم سنگِ میل ہے اور یہ عمل پاکستان میں کرکٹ کے فروغ کے لیے نئے مواقع پیدا کرے گا۔ ٹیموں کی نیلامی کے حوالے سے مزید تفصیلات جلد جاری کی جائیں گی۔